ნათია თურნავა - ბოლო ათწლეულის განმავლობაში ქვეყანამ დეპოზიტების დაზღვევის ეფექტური სისტემის შექმნაში მნიშვნელოვან პროგრესს მიაღწია

საქართველოს ეროვნული ბანკის პრეზიდენტის მოვალეობის შემსრულებელმა, ნათია თურნავამ დეპოზიტების დაზღვევის საერთაშორისო ასოციაციის (IADI) კონფერენციაში მიიღო მონაწილეობა - ამის შესახებ ინფორმაციას სებ-ი ავრცელებს.

როგორც ეროვნული ბანკის მიერ გავრცელებულ განცხადებაშია ნათქვამია, კონფერენციაში, რომელიც ხელს შეუწყობს ქართული ბაზრისთვის დეპოზიტების გარანტიის სქემის უპირატესობების შესახებ ცნობიერების ამაღლებას, სხვადასხვა ქვეყნის ინდუსტრიის წარმომადგენლები და დარგის ექსპერტები მონაწილეობდნენ.

ღონისძიების მონაწილეებმა დეპოზიტების დაზღვევის სისტემების მიღწევებსა და გამოწვევებზე იმსჯელეს.

სიტყვით გამოსვლისას ნათია თურნავამ აღნიშნა, რომ დეპოზიტების დაზღვევის სისტემა უმნიშვნელოვანესი საყრდენია არა მხოლოდ ფინანსური სტრესის მართვისა და მეანაბრეების დაცვის, არამედ ბაზრის ნდობის აღდგენისთვის.

მისი განცხადებით, საქართველოში ბანკები საკმაოდ განვითარებულია, ბოლო ათწლეულის განმავლობაში კი ქვეყანამ დეპოზიტების დაზღვევის ეფექტური სისტემის შექმნაში მნიშვნელოვან პროგრესს მიაღწია, შედეგად სისტემის ჯამური აქტივები საქართველოს წლიურ მშპ-ს აჭარბებს.

"სისტემა კარგადაა კაპიტალიზირებული და ლიკვიდურობის მყარ ბუფერებს ინარჩუნებს, აქვს ძლიერი მომგებიანობა და აქტივების კარგი ხარისხი. ჩვენ მიერ ტესტირებულ მკაცრ სტრეს-სცენარებშიც კი, ბანკები ახერხებენ შეინარჩუნონ სიცოცხლისუნარიანობა და განაგრძონ ფინანსური სერვისების მიწოდება", - დასძინა მან.

სებ-ის პრეზიდენტის მოვალეობის შემსრულებელმა, ეროვნული ბანკის საზედამხედველო და რეზოლუციის ფუნქციაზე ისაუბრა, რაც სებ-ს საქართველოს რეზოლუციის ორგანოდ აქცევს და პასუხისმგებელს ხდის რეზოლუციის ჩარჩოს შემუშავებასა და ქვეყანაში მის ფუნქციონირებაზე.

"ჩვენი ჩარჩო დაფუძნებულია ევროპულ BRR დირექტივაზე, ძირითადად შეესაბამება მას და ამჟამად ვართ ევროკავშირის ჩარჩოსთან სრული შესაბამისობის გზაზე. გარდა ამისა, დეპოზიტების დაზღვევის სააგენტოსთან ერთად ვმუშაობთ ჩვენი ჩარჩოს გაძლიერებაზე, რადგან მისი როლი მომავალში სულ უფრო მნიშვნელოვანი ხდება", - აღნიშნა ნათია თურნავამ.

გიორგი ანთაძე - თუ ასე გაგრძელდა, დასავლეთთან ურთიერთობების აღდგენას და სათანადო რელსებზე დაბრუნებას დიდი დრო შეიძლება დასჭირდეს, ან კიდევ სულაც წარმოუდგენლად გართულდეს
ქართული პრესის მიმოხილვა 15.07.2024
რობინ ვაგენერი - „უცხოური გავლენის გამჭვირვალობის შესახებ“ კანონთან ერთად ევროკავშირში გაწევრიანება აღარ იქნება - ამის შანსი არ არის
ევროკავშირი პროგრამა „განათლება დასაქმებისთვის” ფარგლებში მნიშვნელოვან შედეგებს აქვეყნებს
TNET-ის რეგისტრაციის ოფისი უძრავი და მოძრავი ქონების გაფორმებისა და რეგისტრაციისთვის თბილისში
.ge დომენი წელიწადი 1 ლარად - Domenebi.ge-ს მომხმარებლებს დომენების 2 წლით შეძენა 51 ლარად შეუძლიათ
გაზრდილი სიჩქარე, უცვლელი ფასი