ივანიშვილი და მისი ბანდა არც ღირსეული და არც პარტნიორი მსოფლიოში არავისთვისაა, - ასე გამოეხმაურა „ერთიანი ნაციონალური მოძრაობის” გენერალური მდივნის მოადგილე, ირაკლი ფავლენიშვილი აშშ-ის თავდაცვის დეპარტამენტის განცხადებას.

მისი თქმით, „ღირსეული პარტნიორის“ სწავლების გადადების გადაწყვეტილება არის ივანიშვილის იზოლაციის კურსის შედეგი.

„ამ სწავლების სახელი არის „ღირსეული პარტნიორი“. ივანიშვილი და მისი ბანდა არც ღირსეული და არც პარტნიორი მსოფლიოში არავისთვისაა, მათ შორის ჩვენი მთავარი სტრატეგიული პარტნიორისთვის აშშ-სთვის. მსგავსი ტიპის სწავლებები არ გაიმართება. ესაა რასაც ვამბობდით, ივანიშვილის იზოლაციის კურსი ნიშნავს, რომ არც უსაფრთხოების, არც ეკონომიკური და არც კულტურული კუთხით კავშირი და ბმა დასავლურ სამყაროსთან საქართველოს აღარ ექნება, თუ ივანიშვილი 26 ოქტომბერს არ გავისტუმრეთ“, - განაცხადა ფავლენიშვილმა

შეგახსენებთ, აშშ-ის თავდაცვის დეპარტამენტმა განცხადება გაავრცელა, სადაც წერია, რომ შეერთებულმა შტატებმა საქართველოსთან ურთიერთობების ყოვლისმომცველი გადახედვა დაიწყო, რის ფარგლებშიც სწავლება „ღირსეული პარტნიორის“ ჩატარება განუსაზღვრელი ვადით გადაიდება.