“ოქსიგენ ფესტის” (Oxygen/Fest) მთავარი მუსიკალური დღეები დანიური ჯგუფის Outlandish - ის და KORDZ-ის კონცერტით დაიწყო.

დღეს საღამოს კი საფესტივალო სივრცე, სტეფანესა და „შერეკილების“ კონცერტით უმასპინძლებს სტუმრებს. 7 ივლისს "ოქსიგენს" ჯგუფი „რეგიონი'“ და „MURO“ დახურავენ.

„ჩვენი გუნდი დიდი ხანია ვამბობთ, რომ რუსთავს საფესტივალო ქალაქად ჩამოყალიბების ძალიან დიდი პოტენციალი აქვს და "ოქსიგენი” სწორედ ამის დასტურია. უკვე მესამე წელია, განსაკუთრებით ახალგაზრდებისთვის ცენტრალურ პარკში ტარდება საღამოები, რომლებიც, ჩვენს ქალაქში აქამდე არ ყოფილა. „ოქსიგენი“ წელს იმითაა გამორჩეული, რომ საერთაშორისოა და ძალიან პოპულარული ჯგუფი „აუთლენდიშია“ რუსთავში. მიხარია, რომ როგორც საფესტივალო მიმართულება, ასევე რუსთავის კულტურული განვითარება აქტიურად გრძელდება და „ოქსიგენი“ ამის ნათელი მაგალითია”, - განაცხადა რუსთავის მერმა ნინო ლაცაბიძემ.

რუსთავის მერიის ინფორმაციით, საფესტივალო კარი, 18:00 საათიდან იხსნება. ტერიტორიაზე მოწყობილია კვების და ლუდის სივრცეები, ადგილობრივი მეწარმეების ნამუშევრების გამოფენა-გაყიდვა.

„ოქსიგენი” რუსთავში პირველად 2022 წელს გაიმართა.

საფესტივალო სივრცე, რუსთავის პარკში ამფითეატრისა და რუსთავის ციხის მიმდებარე ტერიტორიაზეა მოწყობილი და სხვადასხვა მუსიკალურ ჯგუფებსა და სტუმრებს, უკვე ერთი თვეა მასპინძლობს.

"ოქსიგენ ფესტი" რუსთავის მერიის და ,,ოქსიგენის“ ორგანიზებით იმართება.