მჯერა, რომ ერთიანობა, რომელიც დღეს იყო წარმოდგენილი, არის პირველი ნაბიჯი და სხვა ოპოზიციური პარტიებიც გვაჩვენებენ ერთიანობის მაგალითს , - ამის შესახებ ოპოზიციონერმა დეპუტატმა თამარ კორძაიამ ახალი პოლიტიკური პლატფორმა „ერთიანობის“ პრეზენტაციის დასრულების შემდეგ ჟურნალისტებთან განაცხადა.

კორძაიას თქმით, გამარჯვების ერთადერთი შანსი არის კომპრომისებით და შეთანხმებებით სვლა.

“დღეს აქ შეკრებილ ადამიანებს, რომლებიც ვერთიანდებით იმისათვის, რომ შევასრულოთ საქართველოს მოქალაქის ნება, გვჯერა და გვწამს, რომ მივიღებთ შედეგს. კომპრომისებით, შეთანხმებებით სვლა გამარჯვების ერთადერთი შანსია. ვხედავთ, რომ “ქართულმა ოცნებამ” 1 წლის მანძილზე სასწორზე დადო ჩვენი ქვეყნის ევროპული მომავალი. ამიტომ მიმაჩნია, რომ პირად გემოვნებაზე საუბარი დღეს უკვე ზედმეტია. დღეს, პოლიტიკურ პარტიებს ერთი რამ მოეთხოვებათ, შეასრულონ მათ მიერ ხელმოწერილი დეკლარაცია, რომლითაც ისინი ამბობენ, რომ პარლამენტში მოხვედრის შემდეგ შექმნიან კოალიციურ მთავრობას, ნებისმიერი ოპოზიციური პარტიისთვის წითელი ხაზი უნდა იყოს “ქართულ ოცნებასთან” ნებისმიერი ფორმით თანამშრომლობა.

მჯერა, რომ ერთიანობა, რომელიც დღეს იყო წარმოდგენილი, არის პირველი ნაბიჯი და სხვა ოპოზიციური პარტიებიც გვაჩვენებენ ერთიანობის მაგალითს იმისათვის, რომ 26 ოქტომბერს, ამომრჩეველს საკუთარი გემოვნების შესაბამისად შეეძლოს არჩევანის გაკეთება”,- განაცხადა კორძაიამ.