იაპონიას ნატო-სთან და მის პარტნიორებთან თანამშრომლობის გაძლიერება აქვს გადაწყვეტილი, - ამის შესახებ იაპონიის პრემიერ-მინისტრმა, ფუმიო კიშიდამ ვაშინგტონში, ნატო-ს სამიტის დაწყების წინ განაცხადა.

„ევროატლანტიკური და ინდო-წყნარი ოკეანის რეგიონის უსაფრთხოება ერთმანეთისგან განუყოფელია. უკრაინის წინააღმდეგ რუსეთის აგრესია და ჩრდილოეთ კორეასთან მისი სამხედრო თანამშრომლობის გაღრმავება ამის ძლიერ შეხსენებას წარმოადგენს. იაპონიას ნატო-სთან და მის პარტნიორებთან თანამშრომლობის გაძლიერება აქვს გადაწყვეტილი“, - განაცხადა ფუმიო კიშიდამ.

იაპონიის პრემიერის თქმით, ზოგიერთი ქვეყნის მცდელობას, დაარღვიოს დამყარებული საერთაშორისო წესრიგი, მსოფლიო არ უნდა შეურიგდეს. მისივე თქმით, "დღეს უკრაინა, ხვალ კი შეიძლება აღმოსავლეთ აზია იყოს".

ცნობისთვის, ვაშინგტონში, ნატო-ს საიუბილეო სამიტს იაპონიასთან ერთად, სამხრეთ კორეის, ავსტრალიისა და ახალი ზელანდიის ლიდერებიც დაესწრებიან.