კიევის ბავშვთა საავადმყოფოს ტერიტორიაზე სამაშველო სამუშაოები დასრულდა, რუსეთის მიერ კიევზე განხორციელებული სარაკეტო იერიშის შედეგად, 29 ადამიანი დაიღუპა, - ამის შესახებ ინფორმაციას უკრაინის შინაგან საქმეთა მინისტრი, იგორ კლიმენკო ავრცელებს.

„საერთო ჯამში, ამ დროისთვის კიევში, 8 ივლისს რუსეთის მიერ განხორციელებული დარტყმის შედეგად 29 ადამიანი დაიღუპა, მათ შორის 4 ბავშვი. დაშავდა 117 ადამიანი, მათგან 10 ბავშვია“, - განაცხადა იგორ კლიმენკომ.

იგორ კლიმენკოს ცნობით, „ოხმატდიტის“ ბავშვთა საავადმყოფოს ტერიტორიაზე 2 ადამიანი დაიღუპა და 32 დაშავდა. დაშავებული 8 ბავშვი „ოხმატდიტიდან“ საავადმყოფოში გადაიყვანეს.

უკრაინული მედიის ინფორმაციით, 8 ივლისს, უკრაინის ტერიტორიაზე რუსეთის სარაკეტო იერიშებს სულ მცირე 42 ადამიანი ემსხვერპლა და 206 დაშავდა.