პოლიტიკური პლატფორმა „ერთიანობას" ერთ-ერთი ლიდერის სერგო ჩიხლაძის განცხადებით, პარტნიორები მცდელობას არ აკლებენ იმისთვის, რომ საქართველოსთვის ევროკავშირის კარი საბოლოოდ არ დაიხუროს.

როგორც ჩიხლაძემ ჟურნალისტებს განუცხადა, მათ ერთადერთ გამოსავლად მიაჩნიათ ოქტომბერში თავისუფალი არჩევნების ჩატარება, რომელიც საქართველოს ევროკავშირის გზაზე დააბრუნებს.

„ჩვენი გერმანელი მეგობრები, ბუნდესტაგის წევრები, პოლიტიკოსები მცდელობას არ აკლებენ, მოიძებნოს გზები იმისთვის, რომ საქართველო-ევროკავშირის ურთიერთობა არ გაფუჭდეს და საერთოდ არ დაიხუროს ის შესაძლებლობების ფანჯარა, რომელიც ჯერ კიდევ არსებობს. ყველამ ერთხმად აღნიშნა, რომ ამ წუთში „ქართული ოცნების“ ქმედებების გამო, ურთიერთობები დაპაუზებულია. ერთადერთ გამოსავლად მიაჩნიათ თავისუფალი არჩევნები ოქტომბერში, რომელიც მდგომარეობას გადატვირთავს და საქართველოს ევროკავშირის გზაზე დააბრუნებს“, - განაცხადა ჩიხლაძემ.

რაც შეეხება საქართველოსთვის ფინანსური დახმარების გაყინვას, სერგო ჩიხლაძის განმარტებით, ამ დახმარებას ქართველ ხალხს კი არ უჩერებენ პარტნიორები, არამედ ხელისუფლებას, რომელიც მისი თქმით, პრორუსულია.

„ვინც თავდაცვისუნარიანობას აზიანებს, ეს პირველ რიგში, „ქართული ოცნება“ არის. რაც შეეხება 30 მლნ-ის შეჩერებას, ნებისმიერი დახმარება, რომელიც მოედინება, მას საქართველოს ხელისუფლება განკარგავს და თუ ის ანტიდასავლურია, რა თქმა უნდა, ჩვენს დასავლელ პარტნიორებს არ სურთ, რომ ეს თანხები პრორუსული ხელისუფლების ხელში მოხვდეს“,-განაცხადა ჩიხლაძემ.