„ლელოს“ პოლიტიკური მდივნის, სალომე სამადაშვილის განცხადებით, „ლელო” არ აპირებს არჩევნებში დამოუკიდებლად მიიღოს მონაწილეობა, ამიტომ „ლელო“ გეგმავს შექმნას ცენტრი იმისათვის, რომ მაქსიმალურად მოხდეს ამომრჩევლის ხმის მობილიზაცია და მათი ხმები არ დაიკარგოს.

როგორც სამადაშვილმა საარჩევნოდ „ლელოს“ პოლიტიკურ გეგმებზე საუბრისას „პალიტრანიუსის“ გადაცემაში “360 გრადუსი“ აღნიშნა, „ლელოს“ კარი ღიაა ყველა პოლიტიკურ პარტიასთან კონსულტაციისთვის.

„ჩვენ პირველებმა განვაცხადეთ, რომ საჭიროა ცენტრების შექმნა, შესაბამისად, კონსულტაციებისთვის ჩვენი კარი ყველასთვის ღია იყო. ეს კარი დღესაც ღია რჩება, იგივე იმ გაერთიანებასთან, რომელიც შედგა „ახლებს“, „დროასა“ და „გირჩი-მეტი თავისუფლებას“ შორის. ჩვენ მათთან გვაქვს მეგობრული ურთიერთობები ვნახოთ, მომავალში შეიცვლება რამე თუ არა. ამის პარალელურად არსებობს აქტიური საზოგადოებრივი ჯგუფები, სხვა საინტერესო პოლიტიკოსები. ამიტომ, ჩვენ ნამდვილად ვაპირებთ, რომ შევქმნათ ცენტრი იმისათვის, რომ მაქსიმალურად მოხდეს ამომრჩევლის ხმის მობილიზაცია და ეს ხმა არ დაიკარგოს. ბიძინა ივანიშვილმა ვერც ერთი მანდატი ვერ უნდა ჩაიდოს ჯიბეში ამ არჩევნებზე, გარდა იმისა, რასაც მისი გაკოტრებული პოლიტიკური ძალა მიიღებს“,- განაცხადა სამადაშვილმა.

მისივე თქმით, პარტიებმა, მიუხედავად მათი პოლიტიკური გემოვნებებისა, ერთმანეთს უნდა ჩაკიდონ ხელი.

„ლელოს“ განწყობა არის ის, მიუხედავად ჩვენი განსხვავებებისა, ქვეყნის გადასარჩენად მზად უნდა ვიყოთ ერთმანეთს ხელი ჩავკიდოთ, შემდეგ კი, როდესაც ქვეყანას გადავარჩენთ, შანსი გვექნება, ნორმალური კონკურენციის პირობებში, გავაგრძელოთ ამ ქვეყნის ცხოვრება“,- განაცხადა სამადაშვილმა.