მემორანდუმი შენი ქვეყნის მოსახლეობასთან უნდა გააფორმო. ესენი დარბიან სადღაც - ადრე საბჭოთა კავშირის პერიოდში მოსკოვში დარბოდნენ, ახლა ბრიუსელში დარბიან, - ამის შესახებ თბილისის მერმა და „ქართული ოცნების“ გენერალურმა მდივანმა, კახა კალაძემ ჟურნალისტებს განუცხადა.

მისივე თქმით, საქართველო არის დამოუკიდებელი, სუვერენული სახელმწიფო, რისთვისაც „ჩვენმა წინაპრებმა იბრძოლა და დღესაც ბრძოლა გვიწევს“.

„მემორანდუმი შენი ქვეყნის მოსახლეობასთან უნდა გააფორმო. ესენი დარბიან სადღაც, ადრე საბჭოთა კავშირის პერიოდში მოსკოვში დარბოდნენ, ახლა ბრიუსელში დარბიან. ჩვენ დამოუკიდებელი, სუვერენული სახელმწიფო ვართ, ამისთვის ჩვენმა წინაპრებმა იბრძოლა და დღესაც ჩვენ ბრძოლა გვიწევს, რომ შევინარჩუნოთ დამოუკიდებლობა, სუვერენულობა. ეს არის ძალიან პრინციპული და მნიშვნელოვანი.

კიდევ ერთხელ ვიმეორებ, ქართველმა ხალხმა უნდა გადაწყვიტოს. შეიძლება ვიღაცებს სურვილი აქვთ, რომ ქართველ ხალხს საერთოდ არ კითხონ. აი, მაგალითად: ბრიუსელში გადაწყვიტოს ვიღაცამ ვინ უნდა იყოს ქვეყნის ხელისუფლებაში, მაგრამ ეს ვერ მოხდება და არასდროს მოხდება! ჩვენ პატივს ვცემთ ჩვენი ქვეყნის მოსახლეობას და წყარო ხელისუფლების, ეს არის ქართველი ხალხი. ქართველი ხალხი გადაწყვეტილებას იღებს ხვალ, ზეგ ვინ უნდა იყოს ხელისუფლებაში, რომ პირველ რიგში გაატაროს, ქართული პოლიტიკა, რომელიც ჩვენი ქვეყნის მოსახლეობის ინტერესებს შეიცავს და ყოველთვის დაიცავს“, - განაცხადა კალაძემ.