პარლამენტის თავმჯდომარე შალვა პაპუაშვილი არ იზიარებს ტელეკომპანია „იმედის“ მფლობელის ირაკლი რუხაძის განცხადებას, რომ „ევროინტეგრაცია კონსტიტუციაში არ უნდა ჩაწერილიყო“.
როგორც პაპუაშვილმა ჟურნალისტებს განუცხადა, „ქართული ოცნების“ პოზიცია ნათელია, რადგან თავადაა კონსტიტუციაში აღნიშნული ჩანაწერის ავტორი.
„ჩვენი პოზიცია ნათელია, ვინაიდან „ქართული ოცნება“ არის ამ ჩანაწერის, განაცხადის ავტორი. ამ ჩანაწერის გარეშეც ცნობილია პოლიტიკური გეზი, რაც „ქართულ ოცნებას“ აქვს - ის, რომ საქართველო სრულად დამკვიდრდეს ევროკავშირის სივრცეში. ამიტომ, არ ვიზიარებ ამ შეფასებას. რაც შეეხება „ქართული ოცნების“ პოზიციას, ის არა მხოლოდ სიტყვით და საქმით, არამედ კონსტიტუციური ჩანაწერითაც ნათელია“,- განაცხადა შალვა პაპუაშვილმა.
კითხვაზე, შესაძლოა თუ არა, რომ რუხაძე ბიძინა ივანიშვილის პოზიციას გამოხატავდეს, პაპუაშვილი ამბობს, რომ „ბიძინა ივანიშვილი ქართული ოცნების“ საპატიო თავმჯდომარეა და სწორედ „ქართული ოცნება“ წარმოადგენს იმ პოლიტიკურ პოზიციას, რაც ბიძინა ივანიშვილს აქვს“.
„ბიძინა ივანიშვილის გარემოცვა „ქართული ოცნებაა“ და „ქართული ოცნების“ პოზიცია გაგაცანით“,- აღნიშნა პაპუაშვილმა.
ცნობისთვის, როგორც ტელეკომპანია „იმედის“ მფლობელმა ირაკლი რუხაძემ აღნიშნა, ევროინტეგრაცია კონსტიტუციაში არ უნდა ჩაწერილიყო.
„მინდა შესვლა“-ს - ბევრი ამბობს, მაგრამ „მნიშვნელოვანია“-ს ამბობს ბევრად უფრო პატარა ნაწილი. ჩვენ გავაფეტიშეთ ეს, ოპოზიცია ამას აკეთებს ღიად დასავლეთის მხარდაჭერით. მთელი ქვეყნის ყურადღება ამაზეა გადატანილი, რადგან ეს არის აყვანილი საკრალურ დონეზე. წერია კონსტიტუციაშიც და მე თუ მკითხავთ არც უნდა ჩაგვეწერა, კონსტიტუცია ცოტა სხვანაირი დოკუმენტია, მუდმივი დოკუმენტია“, - განაცხადა რუხაძემ.
