პარლამენტის თავმჯდომარე კვირაში ერთხელ უძღვნის ბრიფინგებს არასამთავრობო ორგანიზაციებს, თითქოს ამ ქვეყანაში სხვა არაფერია პრობლემა - როგორც ჩანს, სხვა საქმე არ აქვს, - ამის შესახებ არასამთავრობო ორგანიზაციის „დემოკრატიის კვლევის ინსტიტუტის“ დირექტორმა, თამარ ხიდაშელმა „პალიტრანიუსის“ გადაცემაში „რეზიუმე“ განაცხადა, რითაც გამოეხმაურა პარლამენტის თავმჯდომარის, შალვა პაპუაშვილის განცხადებას, რომ „კვლევით დადასტურდა, 500-მდე ორგანიზაციის 80%-ის გრანტი არ ვიცით რამდენია, 70%-ში არ ვიცით დონორი ვინაა, 97% იმასაც კი არ კადრულობს, რომ თქვას, რაში დახარჯეს ფული“.

თამარ ხიდაშელის განცხადებით, შალვა პაპუაშვილის მიერ არგუმენტად მოყვანილი კვლევის შედეგები ციფრებით მანიპულაციაა, რადგან ყველა ის ორგანიზაცია, რომელსაც ხელისუფლება მტრად აცხადებს, აღნიშნული კვლევითაც გამჭვირვალეა, ხოლო ის ორგანიზაციები, რომელთაც ვებ-გვერდი არ აქვთ და გაუმჭვირვალეა, რეგიონებში მდებარე პატარა სათემო ორგანიზაციები არიან.

„საქართველოში რომ არსებობს არაერთი არასამთავრობო ორგანიზაცია, ეს არავისთვის საიდუმლოს არ წარმოადგენს. მაგრამ ყველა ის არასამთავრობო ორგანიზაცია, რომელიც ხელისუფლებამ მტრის ხატად შერაცხა, რეალურად გამჭვირვალეა. მაგალითად, საქართველოს ახალგაზრდა იურისტთა ასოციაცია, სამართლიანი არჩევნები, დემოკრატიის კვლევის ინსტიტუტი, სამოქალაქო საზოგადოების ფონდი და ა.შ. ყველა ეს ორგანიზაცია გამჭვირვალეა, ყველა ამ ორგანიზაციას აქვს ყველაფერი დარეგისტრირებული და ეს თვითონ მათსავე კვლევაშია მოცემული. მაგალითად, საერთაშორისო გამჭვირვალობა საქართველოს აქვს ვებ-გვერდი, მითითებულიო აქვს დონორი. პროექტის დასახელება მითითებული აქვს, გრანტის ოდენობა მითითებული აქვს, ვადა მითითებული აქვს, წლიური ანგარიში გამოქვეყნებული აქვს და ორგანიზაციის გუნდიც განთავსებულია ვებგვერდზე.

ყველა ორგანიზაციას, რომელსაც გვერჩიან, მტრად გვაცხადებ, ყველას გვაქვს ყველა ის მონაცემი, რომლის თაობაზეც ხელისუფლება გვედავება ხოლმე, რომ არ ხართ გამჭვირვალე, გამოქვეყნებული გვაქვს ჩვენს ვებგვერდზე. რაც შეეხება დანარჩენ ორგანიზაციებს, სავარაუდოდ, მათი ნაწილი პატარა სათემო ორგანიზაციებია, რომლებიც მცირე რაოდენობის გრანტებს იღებენ. ისინი არიან ორგანიზაციები, რომლებიც რეგიონებში, სოფლებში, პატარა დაბებში მუშაობენ კონკრეტულ რამდენიმე სოფლის მაცხოვრებელთან და უწევენ მათ დახმარებას. როგორც წესი, მათი დაფინანსება იმდენად მცირეა, რომ ვერ უზრუნველყოფენ ვებ-გვერდის შექმნას“, - განაცხადა თამარ ხიდაშელმა.