შვეიცარიის საგარეო საქმეთა მინისტრი სერგეი ლავროვს შეხვდა, - ამის შესახებ ინფორმაციას შვეიცარიის საგარეო საქმეთა მინისტრი, იგნაციო კასისი ავრცელებს.

იგნაციო კასისის ცნობით, რუს კოლეგასთან შეხვედრაზე უკრაინის მშვიდობის სამიტის შესახებ ისაუბრა.

„გაერო-ს უშიშროების საბჭოში რუსეთის თავმჯდომარეობის ფარგლებში, მე რუსეთის საგარეო საქმეთა მინისტრს, სერგეი ლავროვს შევხვდი და მას უკრაინის მშვიდობის სამიტის შესახებ ვაცნობე“, - წერს კასისი X-ზე.

შვეიცარიელი და რუსი საგარეო საქმეთა მინისტრების შეხვედრა ნიუ-იორკში გაიმართა, სადაც ლავროვი გაერო-ს უშიშროების საბჭოს სხდომებში მონაწილეობის მისაღებად ჩავიდა, რომლის თავმჯდომარე ქვეყანაც მიმდინარე თვეში რუსეთია.

ასევე, ნიუ-იორკში სერგეი ლავროვი უნგრელ კოლეგას, პიტერ სიიარტოსაც შეხვდა, რომელთანაც მოსკოვში შეხვედრის დროს ვლადიმერ პუტინსა და ვიქტორ ორბანს შორის მიღწეული „შეთანხმებების განხორციელების მიმდინარეობა“ განიხილა.