ისრაელის ქნესეთმა ხმათა უმრავლესობით მიიღო რეზოლუცია, რომელიც პალესტინის სახელმწიფოს შექმნას ეწინააღმდეგება, - ინფორმაციას Times of Israel-ი ავრცელებს.

გამოცემის ცნობით, რეზოლუციას მხარი დაუჭირეს პრემიერ-მინისტრ ბენიამინ ნეთანიაჰუს კოალიციაში მყოფმა პარტიებმა, ოპოზიციის მემარჯვენე პარტიებთან ერთად და ბენი განცის ცენტრისტულმა „ეროვნული ერთიანობის“ პარტიამ.

რეზოლუცია 68 ხმით 9-ის წინააღმდეგ მიიღეს და ის სრულად უარყოფს პალესტინის სახელმწიფოს შექმნას, ისრაელთან მოლაპარაკების შედეგადაც კი.

„ისრაელის ქნესეთი მტკიცედ ეწინააღმდეგება იორდანიის დასავლეთით პალესტინის სახელმწიფოს შექმნას. ისრაელის მიწის შუაგულში პალესტინის სახელმწიფოს შექმნა ეგზისტენციალურ საფრთხეს შეუქმნის ისრაელის სახელმწიფოს და მის მოქალაქეებს, გააგრძელებს ისრაელ-პალესტინის კონფლიქტს და დესტაბილიზაციას მოახდენს რეგიონში“, - ნათქვამია რეზოლუციაში.