ჩვენმა ოპონენტებმა მშვიდობიან მსოფლიო მიიღეს მემკვიდრეობად და ომის პლანეტად აქციეს - დავასრულებ ყველა საერთაშორისო კრიზისს, რომელიც ამ ადმინისტრაციამ შექმნა, - ამის შესახებ აშშ-ის ყოფილმა პრეზიდენტმა და „რესპუბლიკელების“ საპრეზიდენტო კანდიდატმა, დონალდ ტრამპმა მილუოკიში, "რესპუბლიკური პარტიის" ეროვნულ ყრილობაზე სიტყვით გამოსვლისას განაცხადა.

მან ჯო ბაიდენის ადმინისტრაცია ავღანეთიდან ჯარების გაყვანის გამო კიდევ ერთხელ გააკრიტიკა.

„ამ კატასტროფით გათამამებული რუსეთი უკრაინაში შეიჭრა. ისრაელმა გადაიტანა ყველაზე საშინელი თავდასხმა მის ისტორიაში. ახლა ჩინეთი დასტრიალებს ტაივანს“, - აღნიშნა ტრამპმა.

ტრამპმა კიდევ ერთხელ გაიმეორა, რომ ის რომ პრეზიდენტი ყოფილიყო, არ მოხდებოდა არც რუსეთ-უკრაინის ომი და არც ისრაელი-„ჰამასის“ ომი.

„დავასრულებ ყველა საერთაშორისო კრიზისს, რომელიც ამ ადმინისტრაციამ შექმნა, მათ შორის რუსეთ-უკრაინის ომს, რომელიც არასდროს მოხდებოდა, მე რომ პრეზიდენტი ვყოფილიყავი და ასევე ისრაელზე თავდასხმის შედეგად გამოწვეულ ომს, რომელიც არასდროს მოხდებოდა, მე რომ პრეზიდენტი ვყოფილიყავი“, - აღნიშნა ტრამპმა.