ბატონო რატი, თქვენგან შეურაცხყოფას მიჩვეული ვარ და როგორც ვირისგან წიხლი არ უნდა გეწყინოს, ისე არ მწყინს თქვენგან შეურაცხყოფა! - ასე მიმართა პარლამენტის ოპოზიციონერმა წევრმა თეონა აქუბარდიამ “ამნისტიის შესახებ “კანონპროექტზე მომხსენებელს, დეპუტატ რატი იონათამიშვილს პარლამენტის პლენარულ სხდომაზე.

სხდომის წამყვანმა, პარლამენტის თავმჯდომარემ შალვა პაპუაშვილმა აქუბარდიას სიტყვა ჩამოართვა, “ქართული ოცნების“ დეპუტატმა გრეტა წიწავამ კი, მას “უზნეო“ უწოდა.

“თუ პატიმრები არ გაინტერესებს, კორექტულად მაინც მოიქეცი!“ - მიმართა წიწავამ აქუბარდიას.

“ამნისტიის შესახებ“ პროექტის განხილვისას აქუბარდიამ განაცხადა, რომ ამნისტია ზონდერებს ეხებათ, მაგრამ არ ეხება “რუსული კანონით“ დაზარალებულებს, რომლებიც კანონის მიღებას მშვიდობიანად აპროტესტებდნენ და დღეს ზოგი დაჯარიმებულია, ზოგი - ბრალდებული, ზოგი - დაკავებული. გარდა ამისა, როგორც აქუბარდიამ აღნიშნა, მინიმალურია იმ მუხლების რაოდენობა, რომელზეც ადამიანები ციხეში სხედან.

პასუხად იონათამიშვილმა აქუბარდიას “არაკომპეტენტური“ უწოდა და კოლეგას მიმართა, რომ მას რომ პროექტი წაკითხული ჰქონდეს, ასეთ კითხვებს არ დასვამდა.