ჯორჯია მელონის განცხადებით, ურსულა ფონ დერ ლაიენთან თანამშრომლობას გააგრძელებს.
„ჩვენ აქამდე ვთანამშრომლობდით და თანამშრომლობას მომავალშიც გავაგრძელებთ. ჩვენ ვართ ადამიანები, რომლებსაც პასუხისმგებლობა აქვთ და მისი მნიშვნელობა გვესმის“, - განაცხადა იტალიის პრემიერ-მინისტრმა.
ასევე, ჯორჯია მელონიმ აღნიშნა, რომ მიუხედავად იმისა, თუ ვინ გახდება აშშ-ის პრეზიდენტი ნოემბერში, იგი ყველასთან თანამშრომლობისთვის მზად არის.
„იტალიის წონასა და როლს ყველა აღიარებს. ჩემთვის მნიშვნელოვანია ამერიკის შეერთებულ შტატებთან ალიანსის სიძლიერე. ფიქრი იმის შესახებ, რომ „დიდი შვიდეულის“ ორ ქვეყანას შორის ალიანსი ხელისუფლების ცვლილების შედეგად შეიცვლება, სულელური და ბავშვურია“, - აღნიშნა ჯორჯია მელონიმ.
შეგახსენებთ, ხუთშაბათს, ევროპარლამენტმა ურსულა ფონ დერ ლაიენი ევროკომისიის პრეზიდენტად მეორე ვადით აირჩია. ჯორჯია მელონის პარტიის „იტალიის ძმების“ წევრებმა ურსულა ფონ დერ ლაიენს მხარი არ დაუჭირეს.
