თელ-ავივის ბენ-გურიონის აეროპორტში ასობით დემონსტრანტმა აქცია მოაწყო და ისრაელის პრემიერ-მინისტრ ბენიამინ ნეთანიაჰუს აშშ-ში დაგეგმილი ვიზიტი გააპროტესტა, - ინფორმაციას გამოცემა Haaretz-ი ავრცელებს.

აქციის მონაწილეებმა მოუწოდეს პრემიერ-მინისტრს, არ გაფრინდეს ვაშინგტონში, სანამ ღაზას სექტორში „ჰამასის“ მიერ დაკავებული ისრაელელი მძევლების გათავისუფლებაზე შეთანხმების მიღწევა არ მოხდება.

გავრცელებული ინფორმაციით, აქციის მონაწილეებს შორის იყვნენ გატაცებული მძევლების ნათესავებიც.

მანამდე გავრცელდა ინფორმაცია, რომ ისრაელის პრემიერ-მინისტრი დღეს შეერთებული შტატების დედაქალაქში ჩასვლას გეგმავს. ის, ვიზიტის ფარგლებში, აშშ-ის პრეზიდენტ ჯო ბაიდენს შეხვდება და კონგრესში სიტყვით გამოვა.