პაატა დავითაია - კონსტიტუციით გაწერილია უფლებამოსილებების გადანაწილება ხელისუფლების შტოებს შორის, მისი დარღვევა აზიანებს დემოკრატიულ პროცესს და სახელმწიფოს იმიჯს
„კატეგორიულად მიუღებელია სასამართლო ხელისუფლების ჩარევა პრეზიდენტის კონსტიტუციურ უფლებამოსილებაში. ეს არის უპრეცედენტო ფაქტი, რომელიც აზიანებს დემოკრატიულ პროცესს და სახელმწიფოს იმიჯს, - ამის შესახებ პარტია „ევროპელი დემოკრატების“ თავმჯდომარემ პაატა დავითაიამ განაცხადა.
დავითაია „ევროპელი დემოკრატების“ სახელით მოუწოდებს სასამართლო ხელისუფლებას, შეაჩეროს ანტიკონსტიტუციური ქმედება.
„სასამართლო სისტემამ გამოიყენა მექანიზმი, რომელიც პირდაპირ ასახავს სასამართლო ხელისუფლების ჩარევას პრეზიდენტის ინსტიტუტის საქმიანობაში. პრეზიდენტის მიერ იუსტიციის უმაღლეს საბჭოში წარმომადგენლის დანიშვნის შეჩერება არის უხეში ჩარევა პრეზიდენტის კონსტიტუციურ უფლებამოსილებაში და კონსტიტუციის დარღვევა.
საქართველოს კონსტიტუციით გაწერილია უფლებამოსილებების გადანაწილება ხელისუფლების სხვადასხვა შტოებს შორის. უფლებამოსილებების აღრევა აზიანებს დემოკრატიულ პროცესს და ქვეყნის ევროპულ გზას. კატეგორიულად მიუღებელია ასეთი მიდგომა, ჩარევა პრეზიდენტის ინსტიტუტის საქმიანობაში. მოვუწოდებთ სასამართლო ხელისუფლებას შეაჩეროს ანტიკონსტიტუციური ქმედება“, - ნათქვამია პარტია „ევროპელი დემოკრატების“ მიერ გავრცელებულ განცხადებაში.
