საქართველოს სტატისტიკის ეროვნული სამსახურის (საქსტატი) 105 წლის იუბილესა და გენდერული სტატისტიკის წარმოების 25-წლიან თარიღთან დაკავშირებით, თბილისში საერთაშორისო კონფერენცია - "გენდერული სტატისტიკა - ინკლუზიური განვითარების პროგრესის დაჩქარებისთვის“ (Accelerating progress towards inclusive development through gender statistics) იმართება. ინფორმაციას სტატისტიკის ეროვნული სამსახური ავრცელებს.

მათივე ცნობით, კონფერენცია, რომელიც საქსტატისა და გაეროს ქალთა ორგანიზაციის ინიციატივით ტარდება, ორი დღის განმავლობაში გაგრძელდება.

კონფერენციის მონაწილეებს მისასალმებელი სიტყვით საქსტატის აღმასრულებელმა დირექტორმა, გოგიტა თოდრაძემ და გაეროს ქალთა ორგანიზაციის (UN Women) ევროპისა და ცენტრალური აზიის რეგიონული ოფისის დირექტორმა, ბელენ სანს ლუკემ მიმართეს.

„სტატისტიკის ეროვნული სამსახურის საიუბილეო თარიღის აღსანიშნავად, ტარდება საერთაშორისო კონფერენცია, რომელშიც მონაწილეობას იღებს მსოფლიოს ათამდე ქვეყნის სტატისტიკის სამსახურის ხელმძღვანელი პირი. მინდა, მივულოცო აღნიშნული დღე ყველა სტატისტიკოსს და მადლობა გადავუხადო ნაყოფიერი თანამშრომლობისთვის“, - განაცხადა გოგიტა თოდრაძემ.

„ნამდვილად დიდი პატივია დღეს აქ ყოფნა, საქსტატის იუბილეს აღსანიშნავად, და აგრეთვე აღვნიშნავთ იმ ხანგრძლივ პარტნიორობას, რომელიც საქსტატთან გვაქვს გენდერულ მონაცემებსა და სტატისტიკაზე. ძალიან სასიამოვნოა, რომ ამ წლების განმავლობაში ჩვენ ძალიან მჭიდრო და ნაყოფიერი თანამშრომლობა გვქონდა საქსტატთან. ამ თანამშრომლობის შედეგად, წლების განმავლობაში უმჯობესდება გენდერული სტატისტიკა. ჩვენ ჩავატარეთ დროის გამოყენების გამოკვლევა და ვხედავთ, რომ ამ გამოკვლევას უკვე აქვს შედეგები საქართველოში. მოხარული ვარ და მოუთმენლად ველი კონფერენციასა და ჩვენი პარტნიორობის შემდგომ გაძლიერებას“, - განაცხადა გაერო-ს ქალთა ორგანიზაციის კვლევებისა და მონაცემთა მიმართულების ხელმძღვანელმა, პაპა სეკიმ.

საქსტატის ცნობითვე, საერთაშორისო კონფერენციაში მონაწილეობას იღებენ ევროკავშირის წევრი, ასევე კანდიდატი ქვეყნების, აღმოსავლეთ პარტნიორობისა (EaP) და ცენტრალური აზიის ქვეყნების სტატისტიკის სამსახურების ხელმძღვანელი პირები და საერთაშორისო ორგანიზაციების მაღალი დონის წარმომადგენლები. ღონისძიებას ესწრებიან საქართველოს სამთავრობო უწყებების, არასამთავრობო ორგანიზაციების, სამეცნიერო წრეებისა და ქვეყანაში აკრედიტებული საერთაშორისო ორგანიზაციების წარმომადგენლები.

კონფერენციის მონაწილეები შვიდი თემატური სესიის ფარგლებში განიხილავენ გენდერული მონაცემების მართვას ეფექტური გადაწყვეტილების მისაღებად, დროის გამოყენების გამოკვლევას, გენდერულ სახელფასო სხვაობას, ქალებისა და გოგოების მიმართ ძალადობის გამოკვლევის შედეგებს, გენდერული თანასწორობის ინდექსს, გენდერული მონაცემების სრულყოფასა და სხვა პრიორიტეტულ საკითხებს.