ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე სუს-ში გამოკითხვაზე კიდევ ერთი პირი, რამაზ ქავთარაშვილი მივიდა. ის უწყებაში მოწმის სტატუსით დაიკითხება.

ჟურნალისტების კითხვაზე, ფლობს, თუ არა ინფორმაციას მიმდინარე გამოძიების შესახებ, ასე პასუხობს: “არაფერი ვიცი”.

“არ ვიცი [რა კითხვებს დამისვამენ]. არაფერი ვიცი. არ ვიცი, რაზე დამიბარეს, საერთოდ არაფერი ვიცი, როგორ გითხრათ”, - განაცხადა რამაზ ქავთარაშვილმა და კითხვის საპასუხოდ აღნიშნა, რომ უკვე გამოკითხულ პირებთან “კომუნიკაცია საერთოდ არ აქვს”.

აღსანიშნავია, რომ მიმდინარე გამოძიების ფარგლებში გამოძიებას ჩვენება დაახლოებით უკვე, ათამდე პირმა მისცა.

ცნობისთვის, სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტებს.

"ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.

სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით", - ნათქვამია სუს-ის მიერ გავრცელებულ ინფორმაციაში.