პარლამენტის ოპოზიციონერი წევრები "უცხოური გავლენის გამჭვირვალობის შესახებ" კანონის წინააღმდეგ გამართული საპროტესტო აქციების დროს დაპატიმრებულ ახალგაზრდებს ომარ ოკრიბელაშვილსა და საბა მეფარიშვილს პირად თავდებში უდგებიან.

პირადი თავდებობის განაცხადზე, რომელიც მოსამართლეს წარედგინება, ხელი უკვე მოაწერეს დეპუტატებმა - ლევან ბეჟაშვილმა, ანა ნაცვლიშვილმა და თეონა აქუბარდიამ.

ხელმოწერის პროცესი პარლამენტში 29 ივლისის ჩათვლით გაგრძელდება.

ოპოზიციის განცხადებით, რამდენიმე თვეა ეს ადამიანები საპატიმრო დაწესებულებაში არიან, მაშინ როცა მათ წინააღმდეგ წაყენებული ბრალი დამტკიცებული არ არის.

ომარ ოკრიბელაშვილსა და საბა მეფარიშვილს სხვისი ნივთის ჯგუფურად დაზიანება-განადგურება ედებათ ბრალად.

19 და 23 წლის ახალგაზრდები სამართალდამცავებმა 14 მაისს დააკავეს. მათ ბრალი სისხლის სამართლის კოდექსის 187-ე მუხლის მე-2 ნაწილის „გ“ ქვეპუნქტით აქვს წარდგენილი, რაც ნივთის ჯგუფურად დაზიანებას გულისხმობს. როგორც გამოძიება აცხადებს, ბრალდებულებმა სხვა პირებთან ერთად, როგორც ფიზიკური ძალის, ასევე, რკინის ნივთის გამოყენებით პარლამენტის შესასვლელთან განთავსებული რკინის დამცავი ჯებირი მიზანმიმართულად დააზიანეს.

ორივე დაკავებულს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა.