დიდ დიღომში, როსტევანისა და ასმათის ქუჩების კვეთაზე, სკვერი ეწყობა, რომლის მიმდინარე სამუშაოებსაც დღეს თბილისის მერი, კახა კალაძე გაეცნო.

ამის შესახებ ინფორმაციას თბილისის მერია ავრცელებს.

„დიდ დიღომში კიდევ ერთი რეკრეაციული პროექტი მიმდინარეობს. აღნიშნული სკვერი მდებარეობს როსტევანისა და ასმათის ქუჩების კვეთაზე და ნახევარ ჰექტარ ტერიტორიას მოიცავს. სამუშაოები რამდენიმე კვირაში დასრულდება. პროექტის ფარგლებში, გაკეთდა სასეირნო ბილიკი, გამოყოფილია ასევე ველობილიკი, ბავშვებისთვის გათვალისწინებულია ატრაქციონების სივრცე, მოეწყობა ფანჩატურები, გაკეთდება სკეიტ მოედანი, რომელიც ძალიან დიდი პოპულარობით სარგებლობს ახალგაზრდებში. ამ ფართიდან გამომდინარე, მაქსიმალურად გამოვიყენეთ ტერიტორია, რათა ყველაფერი ჩაგვეტია. საბოლოოდ, ძალიან კარგი პროექტი გამოვა, როდესაც განათებების მონტაჟი დასრულდება, დაირგვება ხე-მცენარეები და მოეწყობა სარწყავი სისტემა“, - განაცხადა კახა კალაძემ.

პროექტის ფარგლებში ასევე, მოეწყობა საბავშვო, სატრენაჟორო და მაგიდის ჩოგბურთის სივრცეები, დამონტაჟდება LED განათება და სარწყავი სისტემა, მწვანე სივრცეში კი დაირგვება 600-ამდე ხე-მცენარე. პროექტის ღირებულება შეადგენს 1 400 000 ლარს.

სამუშაოებს დღეს მერთან ერთად საბურთალოს რაიონის გამგებელი, გიზო ვასაძე და საკრებულოს მაჟორიტარი დეპუტატი, ავთანდილ ცინცაძე გაეცნენ.