„ერთიანობის ახალგაზრდული ბანაკი" ბაკურიანში დებატების ფინალურ შეხვედრას მართავს. ინფორმაციას პლატფორმა „ერთიანობა“ ავრცელებს.

მათივე ცნობით, სხვადასხვა უნივერსიტეტის სტუდენტები, ოპოზიციური გაერთიანების ლიდერებს და სხვადასხვა პროფესიის წარმომადგენლებს ხვდებიან.

ახალგაზრდული ბანაკის მონაწილეთა მთავარი ინტერესი - ქვეყნის ევროპული ინტეგრაცია, პოლარიზაციის დაძლევა და არჩევნების საკითხია.

“ამ არჩევნებზე გადამწყვეტი ხმა აქვს ახალგაზრდებს. ზოგი უბრალოდ მივა არჩევნებზე,ზოგიც ძალიან მოტივირებულია, რომ დაკვირვების პროცესის კამპანიაში ჩაერთოს და მიხარია, რომ ასეთი მაგარი ახალი თაობა გვყავს. ამ ახალგაზრდებმა მთელ მსოფლიოს ახლიდან გააცნეს საქართველო.

რაც შეეხება პროდუქტს - ეს არის დიდი ინოვაცია, რომელიც ახლა ახალგაზრდებთან პირველად დავტესტეთ და სულ მალე შემოგთავაზებთ ისეთ პროდუქტს, რომელიც იქნება თქვენი პირადობაც, თქვენი დემოკრატიაში მონაწილეობაც და თქვენი შემოსავლის წყაროც. ეს მომავალში, მაგრამ კიდევ ერთხელ ვამბობ, რომ ამ ახალგაზრდებთან ერთად დარწმუნებული ვარ 26 ოქტომბერს ერთიანობის იდეა გაიმარჯვებს,”- განაცხადა ვაშაძემ.