„ქართული ოცნების“ წარმომადგენელთა მხრიდან მცდელობა, რომ მოეთაფლათ თუ მოეტყუებინათ დიპლომატიური კორპუსი, არ გამოვიდა - ის, რასაც „ქართული ოცნება“ ამბობს, არის უბრალოდ ტყუილი, - ასე გამოეხმაურა ერთიანობის” ერთ-ერთი ლიდერი, გია ჯაფარიძე ჟურნალისტებთან საუბრისას, საგარეო საქმეთა სამინისტროში, ევროკავშირის წევრი სახელმწიფოების წარმომადგენლებთან გუშინ გამართულ შეხვედრას, სადაც მათ ევროკავშირში გასაწევრიანებლად შესასრულებელ 9 ნაბიჯზე შედეგები გააცნეს.

როგორც მან აღნიშნა, ეს „ქართული ოცნების“ მხრიდან ჩვენი საერთაშორისო პარტნიორების მოტყუების კიდევ ერთი მცდელობა იყო.

„მეც მქონდა კომუნიკაცია დიპლომატიური კორპუსის წარმომადგენლებთან. მე რა ინფორმაციაც მაქვს, ეს იყო „ქართული ოცნების“ მხრიდან კიდევ ერთი მცდელობა მოეტყუებინა ჩვენი საერთაშორისო პარტნიორები, მოეტყუებინა ევროპის კავშირის წევრი სახელმწიფოების წარმომადგენლები საქართველოში. ეს არ გამოვიდა, ამას არა ჰქონდა შედეგი. თუ სხვა შემთხვევაში ჩვენი საერთაშორისო პარტნიორები რაღაცებზე თვალს ხუჭავდნენ, ამ შემთხვევაში ეს არ გამოვიდა. მეტიც, „ქართული ოცნების“ წარმომადგენელთა მხრიდან ეს მცდელობა, რომ მოეთაფლათ თუ მოეტყუებინათ დიპლომატიური კორპუსი, ჩემი აზრით, დიპლომატების მხრიდან აღქმული იქნა, როგორც ზღვარსგადასული თავხედობა. თუ აქამდე რბილი დიპლომატიური განცხადებებით შემოიფარგლებოდნენ ხოლმე, დღეს უფრო ღიად დააფიქსირეს, რომ ის, რასაც „ქართული ოცნება“ ამბობს, ჩვენს ენაზე რომ ვთქვათ, დიპლომატიური ენა რომ გვერდით გადავდოთ, არის უბრალოდ ტყუილი“, - განაცხადა გია ჯაფარიძემ.

ცნობისთვის, საგარეო საქმეთა სამინისტროში ევროკავშირის წევრი ქვეყნების წარმომადგენლებთან შეხვედრა გაიმართა, სადაც მათ ევროკავშირში გაწევრიანებისთვის შესასრულებელი 9 დათქმის შესრულების ანგარიში მოისმინეს. როგორც შეხვედრის დასრულების შემდეგ ევროკავშირის წარმომადგენლობის ხელმძღვანელის მოვალეობის შემსრულებელმა, ასუნსიონ სანჩეს რუისმა აღნიშნა, შეხვედრაზე საბჭოს დასკვნებზე ისაუბრეს, რომელიც საქართველოში განვითარებულ მოვლენებთან დაკავშირებით ევროკავშირის შეშფოთებას გამოხატავს. მისივე თქმით, ევროკავშირი იმედს გამოთქვამს, რომ მომავალი არჩევნები თავისუფალი და სამართლიანი იქნება.