ეს კანონი ფიზიკურ პირებს არ შეეხება - საბანკო სექტორს რაც შეეხება, საბანკო კონფიდენციალურობა დაცულია კანონით, - ასე უპასუხა ეროვნული ბანკის პრეზიდენტობის მოვალეობის შემსრულებელმა ნათია თურნავამ ჟურნალისტის კითხვას, რა იქნება ეროვნული ბანკის პოლიტიკა, თუ „უცხოური გავლენის გამჭვირვალობის“ კანონის ამოქმედების შემდეგ სახელმწიფო მოითხოვს სასამართლოს გარეშე რომელიმე კლიენტის პირადი მონაცემების გაცემას.

როგორც თურნავამ განმარტა, ამ კანონს საფინანსო სექტორთან და კონფიდენციალურობის თემასთან შეხება არ აქვს და შესაბამისად, მისი სტრუქტურა საკითხთან დაკავშირებით კონსულტაციებში ჩართული არ ყოფილა.

„ჩვენ კონსულტაციებში ჩართული არ ვართ, რადგან ეს კანონი ჩვენს საფინანსო სექტორს არ შეეხება. ცნობილია, რომ ის ფიზიკურ პირს საერთოდ არ ეხება და ზოგადად, საბანკო კონფიდენციალურობა დაცულია სპეციალური კანონით, რომელიც არეგულირებს საბანკო სექტორს, აქედან გამომდინარე, მას ჩვენთან პირდაპირი შეხება არ აქვს. ზოგადად, გამჭვირვალობას მივესალმებით. ჩვენ ვართ ერთ-ერთი ყველაზე გამჭვირვალე სტრუქტურა, მაგრამ უშუალო შეხება საფინანსო სექტორთან და კონფიდენციალურობის თემასთან ამ კანონს არ აქვს. ბუნებრივია, ჩვენ არც უნდა ვიყოთ ამ პროცესში ჩართული“, - განაცხადა თურნავამ.