ყორღანი მძიმე ტექნიკით გაანადგურეს, გვერდიდან არის ეს ყორღანი გამოთხრილი. ჩვენ ვერასოდეს ვერ გავიგებთ, რა დავკარგეთ, - ამის შესახებ იურისტმა სოფო ხორგუანმა, მედიაცენტრ "მთავარში", ეროვნული კულტურული მემკვიდრეობის განზრახ დაზიანებასთან დაკავშირებით განაცხადა.

მისი თქმით, ასპინძის მუნიციპალიტეტში ისტორიული ყორღანი, მძიმე ტექნიკით განადგურდა და პროკურატურას გამოძიების დაწყებისა და დამნაშავე პირების პასუხისგებაში მიცემისკენ მოუწოდებს.

"ძალიან სამწუხარო ამბავი მოხდა. სამცხე-ჯავახეთის რეგიონში, ასპინძის მუნიციპალიტეტში, სოფელ ახჩის მიმდებარედ არის ყორღანები. რამდენიმე ყორღანი 70-იან წლებში გაიხსნა და საინტერესო აღმოჩენები იქნა ნანახი, მაგრამ რამდენიმე ყორღანი არ იყო გახსნილი. ერთ-ერთი ასეთი ყორღანი მძიმე ტექნიკით გაანადგურეს, გვერდიდან არის ეს ყორღანი გამოთხრილი. ეს არის მტკვარ-არაქსის კულტურის ნაწილი. ეს ძალიან მნიშვნელოვანი აღმოჩენების ადგილია. ეს ფაქტი ადასტურებს იმას, რომ ის კულტურული მემკვიდრეობა, რომელიც იმ ტერიტორიაზეა, დაუცველია. ამ ყორღანს აღარაფერი ეშველება. წინა წლებში მუნიციპალიტეტი ამ ადგილებს ათვალიერებდა და მონიტორინგს ახორციელებდა. ჩემი მიმართვა არის პროკურატურისა და კულტურის სამინისტროსთვის, რომ ამ ფაქტის გამოძიება დაიწყოს. შავი არქეოლოგია ყვავის ჩვენთან, განუკითხაობაა. საჯაროდაც გამომაქვს ინფორმაცია, რომ რეაგირება მკაცრი იყოს.

სამწუხაროდ, ეს ერთეული ფაქტი არ არის. ჩვენ ვერასოდეს ვერ გავიგებთ თუ რა დავკარგეთ," - განაცხადა სოფომ ხორგუანმა.

კიდევ ერთი სამოქალაქო აქტივისტის, ვიკა ფილფანის თქმით კი, საქართველოში ძეგლთა შეგნებულად დაზიანების შემთხვევები ხშირია.

მისი შეფასებით, სახელმწიფოს ჩართულობით, საქართველო შესაძლოა არქეოლოგიისა და მეცნიერების ცენტრი გახდეს.

"ეს ფატიც შემთხვევით, ადგილობრივი მოსახლეობისგან გავიგეთ. საქართველოს აქვს დიდი პოტენციალი, რომ არქეოლოგიისა და მეცნიერების ცენტრი გახდეს, თუნდაც რეგიონში. სახელმწიფო თუ არ გაუფრთხილდა ეროვნულ მემკვიდრეობას და იმას, რაც ჩვენს თვითმყოფადობას აღწერს, მაშინ ამ ყველაფერზე საუბარი სისულელეა. საქართველოში დღეს კულტურული მემკვიდრეობა ნადგურდება და ხშირად შეგნებულად. გამოსავალი არის იმაში, რომ სამართალდამცავმა ორგანოებმა ეს საქმე გამოიძიონ და ამ დანაშაულის ჩამდენი პირები შესაბამისად დაისაჯონ. სახელმწიფომ უნდა აიღოს ვალდებულება, რომ მსგავსი ფაქტები აღარ მოხდეს. საქართველოს არ აქვს დასაკარგი ძეგლები. ჩვენ გვინდა, რომ ევროპული ოჯახის ნაწილი გავხდეთ, ამიტომ მნიშვნელოვანია ის იდენტობა და კულტურა, რომელიც ჩვენ გვაქვს, ამიტომ ჩვენ ამ ყველაფერს უნდა გავუფრთხილდეთ," - განაცხადა ვიკა ფილფანმა.