„დემოკრატიის ფესტივალს“ ისეთი პარტია ატარებს, რომელმაც საქართველოში გაანადგურა დემოკრატია, დააპატიმრა მედია, გააუქმა პარლამენტი, ვერტიკალური კონტროლის ქვეშ მოაქცია მართლმსაჯულება, უხეშად დაარღვია ადამიანის უფლებები და ხალხს არჩევნები და არჩევანი წაართვა, - ამის შესახებ უმრავლესობის დეპუტატმა, არჩილ თალაკვაძემ ჟურნალისტებთან საუბრისას განაცხადა.

მისივე თქმით, აღნიშნულ ფესტივალს „ვერანაირი ფასი და შინაარსი ვერ ექნება“.

„ღიმილის მომგვრელი და ცინიკურია ის ფაქტი, რომ კოლექტიური „ნაციონალური მოძრაობა“ საქართველოში „დემოკრატიის ფესტივალს“ ატარებს. ეს კიდევ ერთხელ აჩვენებს, რომ ჩვენ ქვეყანაში მართლაც შევქმენით ისეთი გარემო, სადაც ყველას შეუძლია თანაცხოვრება პოლიტიკურ პარტიებს შორის თუნდაც ისეთი მიუღებელი და ანტისაზოგადოებრივი პარტიისთვის, როგორიც „ნაციონალური მოძრაობაა“. ალბათ, ერთგვარი დაცინვაა მათი მხრიდან, როდესაც -„დემოკრატიის ფესტივალს“ ისეთი პარტია ატარებს, რომელმაც საქართველოში გაანადგურა დემოკრატია, დააპატიმრა მედია, გააუქმა პარლამენტი, ვერტიკალური კონტროლის ქვეშ მოაქცია მართლმსაჯულება, უხეშად დაარღვია ადამიანის უფლებები და ხალხს არჩევნები და არჩევანი წაართვა. ამიტომ, თავისთავად „დემოკრატიის ფესტივალს“ ვერანაირი ფასი და შინაარსი ვერ ექნება. „დემოკრატიის ფესტივალი“ თუ უნდათ უნდა დაიწყონ არჩევნების შედეგების პატივისცემით, პარლამენტის სხდომებში მონაწილეობით, არგუმენტირებული დისკუსიითა და იმ ევროპული პოლიტიკით, რომლისკენაც ჩვენ და ჩვენი საზოგადოება მივდივართ ამ წლების განმავლობაში. საქართველო დღეს არის უფრო დემოკრატიული, თავისუფალი, ევროპული ქვეყანა და ალბათ ამიტომ გახდა შესაძლებელი, რომ „ნაციონალური მოძრაობა“ „დემოკრატიის ფესტივალს“ ატარებს ქვეყანაში“, - განაცხადა არჩილ თალაკვაძემ.

ცნობისთვის, 3 აგვისტოს, თელავში „დემოკრატიის ფესტივალი“ ჩატარდა, სადაც პოლიტიკური პარტიები და მოძრაობები, არასამთავრობო სექტორი და სხვა ორგანიზაციები, მათ შორის ცენტრალური საარჩევნო კომისია, იღებდნენ მონაწილეობას.