ტექნიკური მთავრობა წინასწარ უნდა იყოს გაცხადებული - საზოგადოებამ უნდა იცოდეს წინასწარ ვინ იქნება მოკლევადიანი მთავრობა, - ამის შესახებ საქართველოს პრეზიდენტმა, სალომე ზურაბიშვილმა პრესკონფერენციაზე განაცხადა.

მისივე თქმით, ტექნიკური მთავრობა საიდუმლო არ უნდა იყოს.

“ჩემი გაგებით, ტექნიკური მთავრობა წინასწარ უნდა იყოს გაცხადებული. ეს არ არის საიდუმლო, დამალული რაღაც, რომელსაც გამოვიტან არჩევნების შემდეგ. თუ საუბარია, რომ საზოგადოებაში ნდობა უნდა აიწიოს, სწორედ საუბარია, რომ საზოგადოებამ უნდა იცოდეს წინასწარ ვინ იქნება მოკლევადიანი მთავრობა, რომელი პარტიები იქნებიან პარლამენტში ერთი წლით”, - აღნიშნა ზურაბიშვილმა.

ამასთან, მან ევროკავშირთან მოლაპარაკებების გახსნასთან დაკავშირებით დასმულ კითხვას უპასუხა და აღნიშნა, რომ ფაქტია, რომ მოლაპარაკებები წლის ბოლომდე ვერ გაიხსნება.

“ოქტომბერში რაც იქნება კომისიის დასკვნები, დღევანდელ სიტუაციაზე იქნება. უკვე იწერება დასკვნები - ორი აზრი არ არის, რომ აქ არ იქნება რეკომენდაციები, რომ გაიხსნას მოლაპარაკებები საქართველოსთან. ფაქტია, რომ ამ პირობებში მოლაპარაკებები წლის ბოლომდე ვერ გაიხსნება. თუ არჩევნები ჩატარდა ისე, რომ მათთვის პოზიტიური მაჩვენებელი იქნება, რომ მივდივართ ევროპული გზის დაბრუნებისთვის და მოქმედებები დავიწყეთ ამ მიმართულებით, ჩვენი შანსი არსებობს მომავალ გაზაფხულზე. ეს ის ფანჯარაა, რომელიც უნდა გამოვიყენოთ”, - აღნიშნა პრეზიდენტმა.

ამასთან, პრეზიდენტმა კითხვას: “პრეზიდენტობის ვადის ამოწურვის შემდეგ სად ხედავთ თქვენს როლს, როგორც ცვლილებების, ისე “ქართული ოცნების” ხელისუფლების მმართველობის გაგრძელების შემთხვევაში”, უპასუხა, "არ ვხედავ "ქართული ოცნების” მმართველობის გაგრძელების რამე პერსპექტივას, არც მათთვის და არც ჩემთვის".

მისივე თქმით, 2024 წლის საპარლამენტო არჩევნებმა ევროპული ძალების გამარჯვება უნდა მოიტანოს, იმიტომ, რომ აქ ლაპარაკია ქვეყნის ბედზე და ქვეყნის მომავალზე.

"კიდევ ერთხელ, არა რომელიმე პოლიტიკური პარტიის გამარჯვებაზე, რომელიმე პოლიტიკური ფიგურის გამარჯვებაზე, აქ არის ქვეყნის მომავალი და ეს ყველაზე კარგად ესმის ჩვენს ახალგაზრდობას, მათ მოვუსმინოთ”, - განაცხადა პრეზიდენტმა.