საქართველოს ტურიზმის ეროვნულმა ადმინისტრაციამ სამხრეთ კორეაში, ილსანში, აზიაში ერთ-ერთ უდიდეს ტურისტულ გამოფენაში Korea International Tourism Show მიიღო მონაწილეობა. ტურისტულ გამოფენაზე საქართველო კორეის რესპუბლიკაში საქართველოს საელჩოს ჩართულობით წარდგა.

ტურიზმის ეროვნული ადმინისტრაციის ინფორმაციით, Korea International Tourism Show-ზე, საქართველოს სტენდთან, სტუმრებს საშუალება ჰქონდათ გასცნობოდნენ საქართველოს ტურისტულ პროდუქტებს.

„გამოფენის ფარგლებში, კორეის რესპუბლიკიდან ტურისტული ნაკადების მოზიდვის მიზნით, ტურიზმის ეროვნული ადმინისტრაციის წარმომადგენლებმა შეხვედრები გამართეს კორეის ტურიზმის ორგანიზაციის (KTO) აზიისა და ახლო აღმოსავლეთის დეპარტამენტის დირექტორთან, კანგ იუ იუნგთან და ტურისტული კომპანიის Hanjin travel-ის ხელმძღვანელებთან.

Korea International Tourism Show-ს 50 ათასი სტუმარი ეწვია, გამოფენაზე მსოფლიოს სხვადასხვა ქვეყნის 500 ტურისტული ორგანიზაცია და კომპანია იყო წარდგენილი“, - აღნიშნულია ინფორმაციაში.