რუსულმა ძალებმა ხარკოვზე სარაკეტო თავდასხმა განახორციელეს, რის შედეგადაც პოლიკლინიკის შენობა დაზიანდა, ნანგრევების ქვეშ, შესაძლოა, ადამიანებიც იყვნენ მოყოლილი, - ამის შესახებ ინფორმაციას უკრაინული მედია ავრცელებს.

მათივე ინფორმაციით, თავდასხმა, სავარაუდოდ, „ისკანდერის“ ტიპის რაკეტებით განხორციელდა.

"დარტყმა ქალაქის ცენტრალურ უბანზე. ინფორმაცია ნგრევისა და მსხვერპლის შესახებ ზუსტდება“, - განაცხადა ხარკოვის მერმა, იგორ ტერეხოვმა.

მოგვიანებით მან განმარტა, რომ სარაკეტო თავდასხმის შედეგად პოლიკლინიკის შენობა დაზიანდა.

ხარკოვის საოლქო-სამხედრო ადმინისტრაციის ხელმძღვანელის, ოლეგ სინეგუბოვის ინფორმაციით, ამ დროისთვის სამედიცინო დახმარება ორმა ადამიანმა ითხოვა. ამასთან, მისი თქმით, ნანგრევების ქვეშ, შესაძლოა, ადამიანები იყვნენ მოყოლილი.