უკრაინის თავდაცვის ძალებმა ივლისში უფრო მეტი დრონი გამოიყენეს, ვიდრე ოკუპანტებმა, ეს უკვე სტრატეგიულ გავლენას ახდენენ ომზე და გავლენას ახდენს უკრაინის ინტერესებზე, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

„ჩვენი თავდაცვისა და უსაფრთხოების ძალები ამაში უკვე უპირატესობას იძენენ და ივლისში ჩვენმა ჯარისკაცებმა უფრო მეტი დრონი გამოიყენეს, ვიდრე ოკუპანტმა. ეს ფრონტზე მდგრადი ტენდენცია უნდა იყოს - ყველა ტიპის დრონთან დაკავშირებით, რომელიც ჩვენს ქვედანაყოფებს აქვთ და რომელიც უკვე სტრატეგიულ გავლენას ახდენენ ომზე და გავლენას ახდენს უკრაინის ინტერესებზე“, - აღნიშნა ზელენსკიმ.

მისი თქმით, უპილოტო საფრენ აპარატებთან დაკავშირებით უკრაინის ლიდერობა, შეიძლება იყოს ის ფაქტორი, რომელიც არა მხოლოდ აახლოებს ომის სამართლიან დასრულებას, არამედ უკრაინას სხვა სახელმწიფოებისთვისაც უსაფრთხოების მიმწოდებლად აქცევს.

პრეზიდენტმა ზელენსკიმ ასევე აღნიშნა, რომ წელს უკრაინელ მწარმოებლებთან უკვე მილიონამდე დრონზეა კონტრაქტი გაფორმებული, მაგრამ წლის ბოლომდე, მთლიანობაში, მათი რაოდენობა კიდევ უფრო მეტი იქნება.

„ახლა ყველა დეტალს არ ვამხელთ, მაგრამ ჩვენი შესაძლებლობა, ვაწარმოოთ დრონები, მუდმივად იზრდება და ვმუშაობთ არა მხოლოდ მთავრობის დაფინანსებით, არამედ პარტნიორებთან, რათა მათ ინვესტიცია განახორციელონ დრონების ჩვენს წარმოებაში. იმაში, რაც გვეხმარება დავიცვათ საკუთარი თავი ახლა და შემდგომში კი ეს ხელს შეუწყობს ყველას უსაფრთხოების შენარჩუნებას, ვინც სიცოცხლეს აფასებს და ვინც ახლა ჩვენ გვერდით არის“, - აღნიშნა ზელენსკიმ.

ამასთან, მისი თქმით, უმაღლესი მთავარსარდლის შტაბის სხდომაზე მიიღეს გადაწყვეტილება სარაკეტო პროგრამის დაფინანსების გაზრდის შესახებ.