ახლოვდება ის თარიღი, აგვისტოს ის მძიმე დღეები, როდესაც რუსეთმა ჩვენი ქვეყნის მიმართ კვლავ განახორციელა აგრესია - გაფართოვდა ანექსია, რასაც სამწუხაროდ, საფუძვლად დაედო და ნოყიერი ნიადაგი შეუქმნა იმდროინდელი ხელისუფლების უგუნურმა ნაბიჯებმა, რომელმაც მოახერხა და [საოკუპაციო] ზოლი გაავლო საქართველოს ტერიტორიაზე საქართველოსა და ე.წ ავტონომიურ რესპუბლიკას შორის, - ამის შესახებ “ქართული ოცნების” დეპუტატმა, ბექა ოდიშარიამ ჟურნალისტებთან აგვისტოს ომზე საუბრის დროს განუცხადა.

მისი თქმით, ეს თარიღი მეხსიერებიდან არასდროს წაიშლება და თანამედროვე და მომავალ თაობებს არასდროს დაავიწყდება.

„ახლოვდება ის თარიღი, აგვისტოს ის მძიმე დღეები, როდესაც რუსეთმა ჩვენი ქვეყნის მიმართ კვლავ განახორციელა აგრესია. ეს არის თარიღი, რომელიც ჩვენი მეხსიერებიდან არასდროს წარიშლება, არასდროს დაავიწყდება ჩვენს თანამედროვე და მომავალ თაობებს, რადგან ამ დღეებში გმირულად დაიღუპნენ ჩვენი ჯარისკაცები, რომელთაც საკუთარი სიცოცხლის ფასად ეცადნენ, დაეცვათ თითოეული გოჯი ქართული მიწისა. მიუხედავად ამისა, მტერმა ჩვენზე იმძლავრა და სეპარატისტებთან ერთად მოიპოვა დროებითი წარმატება. მათ არცერთი ბრძოლა არ მოუგიათ. გაფართოვდა ანექსია, რასაც სამწუხაროდ, საფუძვლად დაედო და ნოყიერი ნიადაგი შეუქმნა იმდროინდელი ხელისუფლების უგუნურმა ნაბიჯებმა, რომელმაც მოახერხა და [საოკუპაციო] ზოლი გაავლო საქართველოს ტერიტორიაზე საქართველოსა და ე.წ ავტონომიურ რესპუბლიკას შორის”, - განაცხადა ბექა ოდიშარიამ.

ამავე თემაზე საუბრისას ოდიშარიამ განაცხადა, რომ თუ ვინმემ რუსეთის აგრესიას ხელი შეუწყო ეს „ნაციონალური მოძრაობა” და მისი ხელისუფლებაა.

„მთელი საზოგადოება შეთანხმებული ვართ, რომ რუსეთმა ჩვენს ტერიტორიაზე განახორციელა აგრესია. მაგრამ თუ ვინმემ ამას ხელი შეუწყო და თუ შეიძლება იმ მოვლენებში, რომელიც განვითარდა და რითაც ვერაგულმა ოკუპანტმა ისარგებლა, ვინმეს დამნაშავე ვუწოდოთ, ეს არის “ნაციონალური მოძრაობა” და მისი ხელისუფლება. ყველა შესაძლო დასაშვები შეცდომა მან რეალურ ცხოვრებაში დაუშვა. მან ყველა საბაბი მისცა ოკუპანტს, რომ მას გახსნილი ჰქონოდა ხელი იმისთვის, რომ ჩაედინა დანაშაული, დაეპყრო ტერიტორიები ძალისმიერად. მაგრამ მას მიეცა საბაბი, მათ შორის საერთაშორისო დონეზე განეცხადებინა, რომ თითქოს იქ მოსახლეობის მიმართ იყო განხორციელებული აგრესია იმდროინდელი ხელისუფლების მიერ”, - აღნიშნა ოდიშარიამ.

ამასთან, ოდიშარიამ ისაუბრა აგვისტოს ომის თარიღთან დაკავშირებით წარმოქმნილ აზრთა სხვადასხვაობაზე და აღნიშნა, რომ „ოპოზიციას როგორც აწყობს, ისე ჭრის და კერავს”.

„მაშინ აწყობდათ, რომ 8 აგვისტო ეთქვათ, შემდეგ გადალაგდა საერთაშორისო კონტექსტი და ახლა რამენაირად ცდილობენ თავის დაძვრენას. რაშიც ისინი არიან დამნაშავე, ამას ვერასდროს ჩამოირეცხავენ. ჩვენ ვიცით რომ ოკუპანტი ოკუპანტია, რუსეთმა აგრესია განახორციელა, მაგრამ იმხელა თავი რომ გაბია, პოლიტიკაში ხარ და ქვეყანას ხელმძღვანელობ, უნდა იფიქრო იმაზეც, როგორ აარიდო ქვეყანას დამღუპველი ვითარება“, - აღნიშნა ბექა ოდიშარიამ.