„ერთიანი ნაციონალური მოძრაობის” საგარეო მდივნის, ზურაბ ჭიაბერაშვილის განცხადებით, პრინციპულად მნიშვნელოვანია, რომ აგვისტოს ომის დაწყების თარიღი იყოს 7 აგვისტო და არ არსებობდეს ეჭვი იმასთან დაკავშირებით, ვინ დაიწყო ომი. როგორც ჭიაბერაშვილმა აღნიშნა, ვინც კი ოდნავ ბრალეულობას აკისრებს საქართველოს იმჟამინდელ ხელისუფლებას, ამით ის ებრძვის საქართველოს ეროვნულ ინტერესებს, ტერიტორიულ მთლიანობას და სუვერენიტეტს.

„2008 წლის 7 აგვისტოს რუსეთის შეიარაღებული ძალები უკვე საქართველოს ტერიტორიაზე იყო და 2008 წლის 8 აგვისტოს, საქართველოს მთავარსარდლის, მიხეილ სააკაშვილის საპასუხო გადაწყვეტილება მხოლოდ რეაქცია იყო საქართველოში რუსეთის შეიარაღებული ძალების ფართომასშტაბიან შემოჭრაზე. ჩვენ ამ შემოჭრას გავუძელით ქვეყნის ერთიანობით და იმით, რომ სწორედ ჩვენი დასავლელი პარტნიორები მყარად იდგნენ საქართველოს გვერდით. ამიტომ, ამ თარიღს, 7 აგვისტოს, გადამწყვეტი მნიშვნელობა აქვს. რუსული პროპაგანდა ამტკიცებს, თითქოს ჯერ საქართველომ დაიწყო შეიარაღებული მოქმედებები და მათ მხოლოდ ამის შემდეგ ჰქონდათ ამაზე რეაქცია. მათ უნდათ წარმოაჩინონ, თითქოს ომის დაწყების თარიღი არის 8 აგვისტო. 7 აგვისტოს, რუსეთის შეიარაღებული ძალები საქართველოს ტერიტორიაზე უკვე იყვნენ. ეს არის დოკუმენტურად დადასტურებული“,-განაცხადა ჭიაბერაშვილმა.

მისი განმარტებით, პრინციპულად მნიშვნელოვანია, რომ ომის დაწყების თარიღი იყოს 7 აგვისტო.

„ასევე, მნიშვნელოვანია, არ არსებობდეს ეჭვი იმასთან დაკავშირებით, ვინ დაიწყო ომი. ვინც კი ოდნავ ბრალეულობას აკისრებს საქართველოს მაშინდელ ხელისუფლებას, ამით ის საქართველოს ადანაშაულებს და ებრძვის საქართველოს ეროვნულ ინტერესებს, ტერიტორიულ მთლიანობას და სუვერენიტეტს“, - განაცხადა ზურაბ ჭიაბერაშვილმა.