ავსტრიის დედაქალაქ ვენაში, ტეილორ სვიფტის კონცერტზე თავდასხმის სავარაუდო გეგმასთან დაკავშირებით მიმდინარე გამოძიების ფარგლებში, ერაყის 18 წლის მოქალაქე დააკავეს, - ინფორმაციას CNN-ი ავსტრიის

შინაგან საქმეთა სამინისტროზე დაყრდნობით ავრცელებს.

ამასთან, ზოგიერთი წყაროს ცნობით, ერაყელმა ეჭვმიტანილმა ტერორისტული ორგანიზაცია „ისლამური სახელმწიფოს“ მიმართ ერთგულებაზე 6 აგვისტოს ფიცი დადო, მაგრამ, ჯერჯერობით, გაურკვეველია ჰქონდა თუ არა მას რაიმე კავშირი დაგეგმილ თავდასხმასთან.

მანამდე, სამართალდამცავებმა, თავდასხმის სავარაუდო გეგმასთან დაკავშირებით, 17 და 15 წლის ავსტრიელი ახალგაზრდები დააკავა. გამოცემა Kurier-ის ცნობით, მოგვიანებით, 15 წლის მოზარდი გაათავისუფლეს და ამჟამად მას მოწმის სტატუსი აქვს.

ამერიკელი პოპ-ვარსკვლავის კონცერტები ვენაში ხუთშაბათს, პარასკევს და შაბათს უნდა გამართულიყო, თუმცა, უსაფრთხოების მიზნით, სამივე მათგანი გაუქმდა.