ადამიანები ითხოვენ ცვლილებებს. ყველას ყელში აქვს ამოსული "ქართული ოცნების" მმართველობა, - ამის შესახებ "ერთიანობა - ნაციონალური მოძრაობის“ ერთ-ერთმა ლიდერმა, გია ჯაფარიძემ განაცხადა.

მისი თქმით, მოსახლეობა მთავარ პრობლემად სიღარიბესა და უმუშევრობას ასახელებს.

„საგარეჯოში ვართ, ჩვენი კამპანიის ფარგლებში ადგილობრივ მოქალაქეებთან ვმართავთ შეხვედრებს. ვიტყოდი, რომ განწყობა არის ძალიან ოპტიმისტური. ადამიანები ითხოვენ ცვლილებებს. ყველას ყელში აქვს ამოსული „ქართული ოცნების" მმართველობა. ადამიანები ითხოვენ ერთიანობას, უმეტესობა, 80% ვისაც ვესაუბრეთ, ყველა საუბრობს ერთიანობაზე. ერთი რამ რაც ძალიან თვალში საცემია ეს არის, სიღარიბე და უმუშევრობა, რასაც მოქალაქეები აღნიშნავენ.

ასევე ისიც, რომ იცლება საგარეჯო ახალგაზრდებისგან, არ არის სამუშაო ადგილები. „ქართული ოცნების" 12 წლიანი მმართველობა არანაირ პერსპექტივას არ ტოვებს აქ მაცხოვრებელთათვის. ამიტომ 26 ოქტომბერს ერთიანობით, ჩვენ უნდა შევცვალოთ ვითარება, როგორც საგარეჯოში, ასევე მთლიანად საქართველოში“, - განაცხადა გია ჯაფარიძემ.