ღრმად შეშფოთებულები ვართ ცნობებით იმის შესახებ, რომ ირანი რუსეთისთვის ასობით ბალისტიკური რაკეტის მიწოდებას გეგმავს, - ამის შესახებ აშშ-ის სახელმწიფო დეპარტამენტის პრესსპიკერის მოადგილემ, ვედანტ პატელმა ბრიფინგზე განაცხადა.

„ჩვენ ღრმად შეშფოთებულები ვართ ცნობებით იმის შესახებ, რომ ირანი რუსეთისთვის ასობით ბალისტიკური რაკეტის მიწოდებას გეგმავს. ჩვენ შესაძლო საპასუხო ზომების შესახებ ევროპელ პარტნიორებთან და მოკავშირეებთან კომუნიკაციას ვაგრძელებთ“, - განაცხადა ვედანტ პატელმა.

ვედანტ პატელმა აღნიშნა, რომ უკრაინაში რუსეთის სრულმასშტაბიანი შეჭრის დაწყების შემდეგ აშშ რუსეთსა და ირანს შორის უსაფრთხოების სფეროში პარტნიორობის შესახებ გაფრთხილებას ავრცელებდა.

„ეს პარტნიორობა ევროპის უსაფრთხოებას საფრთხეს უქმნის და ასახავს იმას, თუ როგორ აღწევს ირანის დესტაბილიზაციური გავლენა არა მხოლოდ ახლო აღმოსავლეთს, არამედ მთელ მსოფლიოს“, - აღნიშნა აშშ-ის სახელმწიფო დეპარტამენტის პრესსპიკერის მოადგილემ.

ცნობისთვის, ირანის მიერ რუსეთისთვის ბალისტიკური რაკეტების გადაცემის შესახებ ინფორმაცია თავდაპირველად სააგენტო Reuters-მა გაავრცელა. ამასთან, სააგენტოს ცნობით, ათობით რუსი სამხედრო მოსამსახურე ირანში ბალისტიკური რაკეტების სისტემების გამოყენებას სწავლობს.