თეთრ სახლში აცხადებენ, რომ რუსეთის პრეზიდენტს, ვლადიმერ პუტინს შეუძლია შეაჩეროს ომი უკრაინის წინააღმდეგ, თუ მას ის არ მოსწონს და დისკომფორტს უქმნის.

თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორის, ჯონ კირბის განცხადებით, რუსი ოფიციალური პირების ბოლოდროინდელი განცხადებები იმის შესახებ, რომ კურსკის ოლქში შესვლა კოორდინირებულია დასავლეთის მიერ არის პუტინის პროპაგანდის სასაცილო ნაწილი, რომელსაც ის უკრაინაში შეჭრის დაწყებიდან მოყოლებული ებღაუჭება.

„ერთადერთი, ვინც უკრაინასთან ომშია, რუსები არიან. ისინი შეიჭრნენ უკრაინაში და უკრაინა იცავს თავს აგრესიისგან. ეს არის რუსეთის აგრესიული ომი უკრაინის წინააღმდეგ - არც მეტი, არც ნაკლები და ასე იყო თავიდანვე. ეს არის პუტინის ომი უკრაინის წინააღმდეგ და თუ მას ეს არ მოსწონს, თუ ეს მას დისკომფორტს უქმნის, მაშინ არსებობს მარტივი გამოსავალი: შეუძლია უბრალოდ გამოვიდეს უკრაინიდან და შეწყვიტოს ის“, - აღნიშნა ჯონ კირბიმ.

შეგახსენებთ, გასული კვირის დასაწყისიდან უკრაინელი სამხედროები კურსკის ოლქის ტერიტორიაზე ოპერაციას ახორციელებენ. უკრაინის შეიარაღებული ძალების მთავარსარდლის, ალექსანდრ სირსკის თქმით, ამ დროისთვის ისინი რუსეთის დაახლოებით 1 000 კვადრატულ კილომეტრ ტერიტორიის აკონტროლებენ.