ჩვენი გამარჯვების გზა გადის ერთობაზე, მრავალფეროვნებაზე და კოალიციის შეთავაზებაზე, რომელიც ჩვენი მომავალია,- ამის შესახებ “კოალიცია თავისუფლებებისთვის“ წევრმა, ელენე ხოშტარიამ ბრიფინგზე განაცხადა.

მისი თქმით, კოალიცია, რომელსაც ისინი საზოგადოებას შესთავაზებენ, არის კოალიცია, რომელიც მართლაც მოიტანს ცვლილებებს და არავის არ მისცემს საშუალებას, რომ ქვეყანა თავად იმსახუროს.

„ჩვენი გამარჯვების გზა გადის ერთობაზე, მრავალფეროვნებაზე და კოალიციის შეთავაზებაზე, რომელიც ჩვენი მომავალია. ერთობა და ძალა, რომელიც შედგება მრავალფეროვანი, მაგრამ ძალიან პრინციპული ადამიანებისგან. ერთობა და კოალიცია, რომელიც შედგება ფასეულობებისადმი ერთგულებისგან და რომელიც შედგება მართლაც ქვეყნისთვის მებრძოლი ადამიანებისგან. კოალიცია, რომელსაც ჩვენ საზოგადოებას შევთავაზებთ, არის კოალიცია, რომელიც მართლაც მოიტანს ცვლილებებს, არავის არ მისცემს საშუალებას, რომ ქვეყანა თავად იმსახუროს, არამედ თვითონ იქნება ქვეყნის მსახური. ამიტომ, დღეს ძალიან მიხარია, რომ სწორედ ასეთი პარტია, ასეთი ადამიანთა ჯგუფი და გამორჩეული პოლიტიკოსი უერთდება ჩვენს რიგებს - ეს არის ხათუნა სამნიძე. ადამიანი, რომელიც გამოირჩევა ნებისმიერ სიტუაციაში პრინციპულობით, ბრძოლით. ჩვენ ერთად გვაქვს გავლილი ქვეყნისთვის ძალიან მნიშვნელოვანი ბრძოლის გზა. ჩვენ ყოველთვის სხვადასხვა პარტიაში ვიყავით, მაგრამ კრიტიკულ მომენტში - იქნებოდა ეს „რუსული კანონის“ წინააღმდეგ ბრძოლა, პარლამენტის გარეთ, ქუჩაში, ადამიანის უფლებებისთვის თუ სხვა, ყოველთვის ერთად ვიდექით და ამ ბრძოლას ერთად გავაგრძელებთ“, - განაცხადა ხოშტარია.