„ერთიანი ნაციონალური მოძრაობის“ აჭარის ორგანიზაციის წევრების, რეზო ხარაზისა და ბონდი თედორაძის განცხადებით, „ქართული ოცნების“ მიერ, აჭარაში წარმოდგენილი დელეგატები, ანზორ ბოლქვაძე და გია ჭყონია „ნეპოტიზმითა და უკონკურენტოდ ტენდერების მოგებით გამდიდრდნენ“. ოპოზიციის წევრებმა საგანგებო ბრიფინგი აჭარის მთავრობის სახლთან გამართეს.

„ყველას კარგად მოგეხსენებათ, რომ მაჟორიტარული სისტემა მივაბარეთ წარსულს, თუმცა, „ოცნება“ მაინც ებღაუჭება მას და ამჯერად ივანიშვილმა თავისი „დელეცები“ წარმოგვიდგინა ე.წ დელეგატების სახით. მინდა, კარგად იცოდეს საზოგადოებამ, ვინ არიან ეს ადამიანები, როგორ მოახერხეს ივანიშვილის „დელეცად“ წოდებულმა ანზორ ბოლქვაძემ და გია ჭყონიამ გამდიდრება იმ ფონზე, როცა აჭარაში ოფიციალური სტატისტიკით 147 000 ადამიანი სიღარიბეს ებრძვის, აქედან 25 000 ბავშვი სოციალურად დაუცველია და სახელმწიფო შემწეობაზეა. როგორ მოახერხეს აჭარის სანაპიროზე საუკეთესო ადგილების, მიწების მისაკუთრება, როგორ მოახერხეს ყველა მსხვილი ტენდერის უკონკურენტოდ მოგება. მაგალითად, დეპუტატი ანზორ ბოლქვაძე ფლობს წილებს სხვადასხვა კომპანიაში, ნეპოტიზმი არის მისი მთავარი ხაზი და რაც მნიშვნელოვანია, ის აკონტროლებს მაღალმთიანი აჭარის ყველა მუნიციპალიტეტის ბიუჯეტს თავისი საცეცებით“,- განაცხადა ბათუმის საკრებულოს წევრმა რეზო ხარაზმა.

„ერთიანი ნაციონალური მოძრაობის“ წევრმა ბონდო თედორაძემ კი აღნიშნა, რომ ივანიშვილი, ნაცვლად სიღარიბის დაძლევისა, ნაცვლად სიახლისა - გვაბრუნებს წარსულში, „სადაც კორუფციით, ნეპოტიზმით, ტენდერების ჩაწყობით, ახლა უკვე თავისი ე.წ დელე(ც)გატი გია ჭყონია შესთავაზა აჭარას და კონკრეტულად, ქობულეთს“.

„ჩვენმა ხალხმა უნდა იცოდეს, რომ 2024 წლის 26 ოქტომბერს ერთ მხარეს არის მილიონერი გია ჭყონია თავისი ჩაწყობილი ტენდერებით, მწვანე კონცხზე და არა მარტო იქ, გროშებად მიტაცებული სახელმწიფო მიწებით, „ოცნებისთვის“ შეწირული მილიონობით ლარით, ხოლო, მეორე მხარეს არის ევროპული, ცივილიზებული, წარმატებული სახელმწიფოს იდეა, სადაც ხელისუფალი ზრუნავს ხახალზე და ასრულებს ხალხის დაკვეთას, წარმატებულ ბიზნესს კი აქვს თავისი ადგილი“, - აღნიშნა ბონდო თედორაძემ.