ნუ უსმენთ „ქოც“ პროპაგანდისტებს, მათ მხოლოდ ერთი ინტერესი აქვთ - გაიხანგრძლივონ ხალხის ძარცვის უფლება, - ამის შესახებ კოალიცია „ერთიანობა-ნაციონალური მოძრაობის“ წევრმა, პაატა მანჯგალაძემ განაცხადა, რითაც „ქართული ოცნების“ განცხადებას გამოეხმაურა.

მისი თქმით, ოქტომბრის არჩევნები არის იმის შესახებ, თუ როგორ ქვეყანაში სურთ მოქალაქეებს ცხოვრება.

„ნუ უსმენთ „ქოც“ პროპაგანდისტებს, მათ მხოლოდ ერთი ინტერესი აქვთ, გაიხანგრძლივონ ხალხის ძარცვის უფლება. სინამდვილეში ეს არჩევნები იმაზეა, თუ როგორ ქვეყანაში გვინდა ცხოვრება, იზოლირებულსა და გაღატაკებულში, რასაც „ქოცები“ გვთავაზობენ, თუ ევროპულსა და განვითარებულში, რომელიც ერთიანობით შეგვიძლია ავაშენოთ?! გვინდა, რომ ეს ქვეყანა კიდევ უფრო მეტად დაცარიელდეს, თუ გვინდა, რომ ემიგრანტები დაბრუნდნენ და გავაერთიანოთ საქართველო?! არჩევანი მარტივია, ერთიანობა, ევროპა, ინვესტიცია და დასაქმება” - განაცხადა პაატა მანჯგალაძემ.

ცნობისთვის, „ქართული ოცნების“ განცხადებით, არჩევნებზე საკონსტიტუციო უმრავლესობის მოპოვებისთანავე მათ მიერ დაინიცირდება სამართლებრივი პროცესი, რომლის შედეგადაც „ერთიანი ნაციონალური მოძრაობა“ და ყველა მისი სატელიტი თუ მემკვიდრე პარტია არაკონსტიტუციურად გამოცხადდება“. გარდა ამისა, როგორც მმართველი პარტია აღნიშნავს, საკონსტიტუციო ცვლილებების მიღებას მოახდენს ტერიტორიულ მოწყობასთან დაკავშირებულ საკითხზეც. „ტერიტორიული მთლიანობის აღდგენის შემთხვევაში, აუცილებელი გახდება კონსტიტუციის ცვლილება, რათა მმართველობის სისტემა და ტერიტორიული სახელმწიფოებრივი მოწყობა ახალ რეალობასთან მოვიდეს შესაბამისობაში“, - ნათქვამია „ქართული ოცნების“ პოლიტსაბჭოს განცხადებაში.