აშშ-ის სახელმწიფო მდივანმა ენტონი ბლინკენმა დიდი ბრიტანეთის საგარეო საქმეთა მინისტრთან სატელეფონო საუბრისას უკრაინის მხარდაჭერის საკითხი და ღაზაში არსებული ვითარება განიხილა, - ამის შესახებ განცხადებას აშშ-ის სახელმწიფო დეპარტამენტი ავრცელებს.

„მხარეებმა უკრაინის მიმართ მათი მტკიცე მხარდაჭერა კიდევ ერთხელ დაადასტურეს“, - ნათქვამია განცხადებაში.

სატელეფონო საუბრისას ენტონი ბლინკენმა და დევიდ ლემიმ ღაზაში ცეცხლის შეწყვეტის შეთანხმების მიღწევის, ჰუმანიტარული დახმარების მიწოდების გაზრდისა და მძევლების სახლში დაბრუნების მნიშვნელობას ხაზი გაუსვეს.

ასევე, აშშ-ის სახელმწიფო მდივანმა და დიდი ბრიტანეთის საგარეო საქმეთა მინისტრმა რეგიონში არსებული დაძაბულობის დეესკალაციის აუცილებლობის საკითხი განიხილეს.