ეს არჩევნები, თავისი მნიშვნელობით, განსაკუთრებულია, - ამის შესახებ „ქართული ოცნების“ დეპუტატმა არჩილ თალაკვაძემ მცხეთაში, პარტიის საარჩევნო კამპანიის რეგიონული ღონისძიებაზე ჟურნალისტებთან განაცხადა.

მისი თქმით, მოქალაქეები არა მხოლოდ პოლიტიკურ პარტიებს შორის აკეთებენ არჩევანს, არამედ ომსა და მშვიდობას შორის.

„ეს არჩევნები, თავისი მნიშვნელობით, არის განსაკუთრებული, ვინაიდან არა მხოლოდ ახალ პარლამენტს ირჩევენ ჩვენი მოქალაქეები, არამედ ჩვენი საზოგადოება ახლა აკეთებს არჩევანს რთულ დროს ძალიან რთული გამოწვევების გარემოში და იმ პროცესების ფონზე, რაც რეგიონში მიმდინარეობს და იმ ზეწოლის ფონზე, რომელიც ასევე საქართველოს მიმართ იყო ამ წლების განმავლობაში.

ჩვენი მოქალაქეები აკეთებენ არა მხოლოდ პოლიტიკურ პარტიებს შორის არჩევანს, არამედ აკეთებენ არჩევანს მშვიდობასა და ომს შორის, აკეთებენ არჩევანს სტაბილურობასა და დესტაბილიზაციას შორის, აკეთებენ არჩევანს ფსევდო ლიბერალიზმს, სიძულვილსა და ღირსებას შორის. რაც მთავარია, აკეთებენ არჩევანს განვითარებასა და დესტაბილიზაციას შორის, რომელსაც რადიკალური ოპოზიცია მთელი ამ წლების განმავლობაში მიმართავდა. ამიტომ არის მნიშვნელოვანი ამ არჩევნებში ყველას ჩართულობა და მონაწილეობა. რაც უფრო მეტი მოქალაქე მოვა და გააკეთებს არჩევანს, მხარს დაუჭერს მშვიდობას, ქვეყნის განვითარებას, პროგრესსა და ღირსებით ევროპისკენ სვლას, მით უფრო მეტი გარანტია გვექნება ჩვენ ყველას ერთად, რომ საქართველო შეინარჩუნებს იმ მიღწევებს, რაც დღემდე აქვს - ეს არის მშვიდობა, ეკონომიკური ზრდა და არსებითი პროგრესი ევროინტეგრაციის გზაზე“, - განაცხადა არჩილ თალაკვაძემ.