პეკინი და მინსკი თავდაცვის სფეროში ორმხრივ თანამშრომლობას გააძლიერებენ, - ამის შესახებ ჩინეთისა და ბელარუსის მთავრობების ერთობლივ კომუნიკეშია აღნიშნული, რომელიც ჩინეთის პრემიერის, ლი ციანის ბელარუსში ოფიციალური ვიზიტის ფარგლებში გამოქვეყნდა.

„ორივე მხარე გააძლიერებს თანამშრომლობას თავდაცვის, მართლმსაჯულებისა და უსაფრთხოების სფეროებში“, - ნათქვამია ერთობლივ კომუნიკეში.

დოკუმენტში აღნიშნულია, რომ მხარეები ასევე გააღრმავებენ თანამშრომლობას სამხედრო მოსამსახურეების მომზადების, კიბერდანაშაულისა და ტრანსნაციონალური დანაშაულის წინააღმდეგ ერთობლივ ბრძოლაში, ასევე „ბოროტების სამი ძალის“ (ტერორიზმი, ექსტრემიზმი და სეპარატიზმი) წინააღმდეგ ბრძოლაში.

ჩინეთის პრემიერ-მინისტრი, ლი ციანი ბელარუსს ოფიციალური ვიზიტით 22-23 აგვისტოს ეწვევა.