„ერთიანი ნაციონალური მოძრაობის“ თავმჯდომარე თინა ბოკუჩავა და „ერთიანობა-ნაციონალური მოძრაობის“ ლიდერი გიორგი ვაშაძე აშშ-ში ვიზიტის ფარგლებში სენატორ კრის კუნსს შეხვდნენ.

გაერთიანების ინფორმაციით, სენატორი კრის კუნსი პრეზიდენტ ბაიდენთან დაახლოებული პირია, რომელიც ერთ-ერთი მთავარი გამომსვლელი იყო დემოკრატიული პარტიის კონგრესზე.

„ვისაუბრეთ 26 ოქტომბრის არჩევნებზე, ისევე როგორც პრეზიდენტი სააკაშვილის უკანონო პატიმრობაზე და მისი გათავისუფლების მნიშვნელობაზე. სენატორი კუნსი არაერთხელ არის ნამყოფი საქართველოში და გააგრძელებს საქართველოს ევროატლანტიკური კურსის მხარდაჭერას აშშ-ის სენატში“, - განაცხადა თინა ბოკუჩავამ.

შეგახსენებთ, რომ „ერთიანი ნაციონალური მოძრაობის“ თავმჯდომარე თინა ბოკუჩავა და „ერთიანობა - ნაციონალური მოძრაობის“ ლიდერი გიორგი ვაშაძე აშშ-ში, ჩიკაგოში, დემოკრატიული პარტიის კონგრესზე იმყოფებიან, სადაც კონგრესის ფარგლებში ისინი არაერთ „დემოკრატ“ სენატორ და კონგრესმენს შეხვდნენ.