ღიმილის მომგვრელია ამ უკვე წასულთა ასეთი ბაქიბუქი - ივანიშვილის დაჯგუფებაში კარგად ესმით, რომ მათი დღეები დათვლილია და ქართველი ხალხი მათ პოლიტიკურ განაჩენს გამოუტანს, - ასე გამოეხმაურა „ერთიანობა - ნაციონალური მოძრაობის“ ერთ-ერთი ლიდერი, არმაზ ახვლედიანი „ქართული ოცნების“ წევრების განცხადებას არჩევნების შემდეგ ოპოზიციური პარტიების აკრძალვაზე.

მისივე თქმით, ოპოზიციური პარტიები, ქართველი ხალხი საქართველოს ევროპულ მომავალს „ქართული ოცნების“ დამფუძნებელს, ბიძინა ივანიშვილს არ დაუთმობს.

„გულწრფელად გეტყვით, რომ ერთი მხრივ, ღიმილის მომგვრელია ამ უკვე წასულთა ასეთი ბაქიბუქი. მეორე მხრივ, ვხვდებით, რომ ივანიშვილს პირდაპირი შეკვეთა კრემლიდან აქვს, ჯერ კიდევ გააჩნია იმის რესურსი, რომ იმავნებლოს. ეს სხვა არაფერია თუ არა დაანონსება ტერორისა. ვფიქრობ, ივანიშვილის დაჯგუფებაში კარგად ესმით, რომ მათი დღეები დათვლილია და ქართველი ხალხი მათ პოლიტიკურ განაჩენს გამოუტანს. თუმცა, არასდროს ქართველი ხალხის დემოკრატიული არჩევანით არჩეული მთავრობა, ანუ ჩვენ, კოალიციური ერთობა არ განვიზრახავთ იმას, რასაც ეს მავნებლები და კრემლის დაკვეთის შემსრულებლები ახლა ასრულებენ და საქართველოში აპირებენ.

დარწმუნებული ვარ, რომ საკონსტიტუციო უმრავლესობა „ქართული ოცნების“, ისევე როგორც უბრალო უმრავლესობა „ქართული ოცნების“, ნიშნავს იმას, რომ ივანიშვილმა მიიტაცა, ბოლომდე გააყალბა და ჩვენ შევარჩინეთ. ჩვენი ერთიანობა, პასუხისმგებლიანი ოპოზიცია, ქართველი ხალხი არ ვაპირებთ, რომ ივანიშვილს დავუთმოთ საქართველოს ევროპული მომავალი, ჩვენი მომავალი. შესაბამისად, ივანიშვილი უნდა ხვდებოდეს, რა ბეწვის ხიდზე გადის, რას და ვის ეთამაშება.

რაც შეეხება იმას, რომ მანდატების გაუქმება განიზრახა, დღეს უკვე ჩვენი ყველა პარტნიორი ივანიშვილის მავნებლურ, დანაშაულებრივ მისწრაფებებს, სურვილებს გმობს. ქართველი ხალხი კი ნამდვილად, ამის შემყურე და გამგონი უფრო მეტი შემართებით, ერთიანობით მას პოლიტიკურ განაჩენს გამოუტანს და მმართველებიდან მოიშორებს“, - განაცხადა ახვლედიანმა.

ჟურნალისტის კითხვაზე, იმ შემთხვევაში, თუკი „ქართული ოცნება“ 2024 წლის საპარლამენტო არჩევნებში გაიმარჯვებს, მოსალოდნელია, თუ არა, რომ ოპოზიციური პარტიების ლიდერების დაკავებები დაიწყოს, ახვლედიანი აცხადებს, რომ „ქართული ოცნება“ ყველაფერზე წამსვლელია“.

„რა თქმა უნდა, წამსვლელია. ვინმე დამისახლებს კი რამეს ისეთს, რაზეც ივანიშვილი წამსვლელი არ არის? - ვერავინ. ყველაფრის მკადრებელია და ყველაფერზე წამსვლელია, მით უფრო, როცა ხვდება, რომ მისი პოლიტიკური დღეები დათვლილია. ამიტომაც, როგორც არასდროს, ოპოზიციას მართებს გონივრული ერთიანობა, ერთიანობა საქართველოს გამარჯვების იდეის ირგვლივ, რომ ამით ქვეყანაში სწორი, მიზანმიმართული მუხტი შევქმნათ და რაც შეიძლება საგრძნობი უპირატესობით დავამარცხოთ ივანიშვილის მავნებლური, პუტინისტური რეჟიმი“, - აღნიშნა ახვლედიანმა.