პოლიტიკურმა გაერთიანებამ - „კოალიცია ცვლილებისთვის - გვარამია, მელია, გირჩი, დროამ“ ახალციხის ოფისი გახსნა.

როგორც ოფისის გახსნისას, ნიკა მელიამ აღნიშნა, არჩევნებზე რეალური ცვლილება უნდა დაიწყონ.

„მინდა გითხრათ, რომ ყოველდღე ვცდილობ ვიყო სხვადასხვა რეგიონში, ქალაქსა თუ სოფელში. მინიმუმ ორჯერ მეტია იმ ადამიანთა რიცხვი, ვისაც სურს ცვლილებები, ამ ორჯერ მეტს შორის ბევრი და არც თუ ისე ცოტაა, ვისაც ცვლილებები სურს, მაგრამ უიმედოა. ნელ-ნელა მათში ეს უიმედობა ქრება და იმედიც გაჩნდება. ახალციხელებმაც, თითოეულმა მოქალაქემ ერთმანეთი უნდა გავამხნეოთ, რომ გვჯერა და გვწამს ცვლილებების. ახლა ისე, როგორც არასდროს მჯერა ცვლილების! ჩვენ შეგვიძლია ეს ქვეყანა შევიყვანოთ ევროკავშირში, თითოეულ ახალციხელს გაუჩნდეს იმედი უკეთესი და ბედნიერი მომავლის. ჩვენ ერთმანეთი უნდა გავაძლიეროთ, განწყობა და მტკიცედ დგომა არის ჩვენი გასაღები, ასევე პრინციპულობა და უკომპრომისობა.

ჩვენ გვინდა რეალური ცვლილება. მაგალითად, თბილისი არის ისეთი ოპოზიციური, როგორც არასდროს, ასეა რეგიონებშიც. ჩვენ ერთად უნდა მივიდეთ არჩევნებზე და რეალური ცვლილება დავიწყოთ”, - განაცხადა მელიამ, რომლის კომენტარსაც პარტიის პრესსამსახური ავრცელებს.

მათივე ცნობით, „კოალიცია ცვლილებისთვის” ლიდერები დღეს სამცხე-ჯავახეთის მასშტაბით ოფისებს ხსნიან.