პოლიტიკურმა გაერთიანებამ „კოალიცია ცვლილებისთვის - გვარამია, მელია, „გირჩი“, „დროამ“ ლაგოდეხის ოფისი გახსნა.

ამის შესახებ ინფორმაციას გაერთიანების პრესსამსახური ავრცელებს.

ოფისის გახსნისას, ნიკა მელიამ აღნიშნა, რომ ლაგოდეხში „კოალიცია ცვლილებებისთვის“ ოფისის გახსნით ეს კუთხე და ქვეყანა განვითარების ახალ ეტაპზე გადავა.

„დღეიდან ლაგოდეხში გვექნება „კოალიცია ცვლილებებისთვის“ ოფისი. გადაჭარბების გარეშე, მინიმუმ ორჯერ მეტი ადამიანია, რომელსაც ცვლილებები სურს. ასეთი რამ მანამდე, არცერთ არჩევნებზე არ ყოფილა. არსებობენ ადამიანები, რომლებსაც გამხნევება სჭირდებათ. უნდა დავარწმუნოთ, რომ ცვლილებები გარდაუვალია. ამ არჩევნებში წარსულს ჩაბარდა მაჟორიტარული სისტემა. გარდა ამისა, წარსულს ჩაბარდა ორი ტურისგან შემდგარი არჩევნები, ეს ორი რაღაც იყო ხელისუფლებისთვის ხელსაყრელი. სხვა საარჩევნო წლებში, „ოცნებას“ ჰქონდა დასავლური მხარდაჭერა, ახლა ესეც შეცვლილია. ის საპროტესტო მუხტი რაც თბილისში გაზაფხულზე იყო არსად წასულა. ჩვენ ქვეყანას ევროკავშირში შევიყვანთ და ამ ქვეყანას განვითარების ახალ ეტაპზე გადავიყვანთ”, - განაცხადა მელიამ.