ვოლოდიმირ ზელენსკი - სურვილი გვაქვს, რომ პოლონეთმა თავისი „მიგ“-ის ტიპის თვითმფრინავები გადმოგვცეს

სურვილი გვაქვს, რომ პოლონეთმა თავისი „მიგ“-ის ტიპის თვითმფრინავები გადმოგვცეს, - ამის შესახებ უკრაინის პრეზიდენტმა ვოლოდიმირ ზელენსკიმ ფორუმზე „უკრაინა 2024. დამოუკიდებლობა“ განაცხადა.

„ძალიან გვჭირდება თქვენი „მიგ“- ები, ვინაიდან კარგი ავიონიკა აქვთ და პილოტების მომზადებაზე დროს არ დავკარგავთ“, - განაცხადა ზელენსკიმ.

უკრაინის პრეზიდენტმა აღნიშნა, რომ ამ საკითხზე პოლონეთის პრეზიდენტთან ანჯეი დუდასთან და პრემიერ-მინისტრთან დონალდ ტუსკთან უსაუბრია, „თუმცა დადებითი პასუხი ჯერ არ არის“.

ცნობისთვის, ივლისში პოლონეთის პრემიერ-მინისტრმა დონალდ ტუსკმა განაცხადა, რომ პოლონეთმა უკრაინისთვის საბჭოური მოდელების ავიაგამანადგურებლების დამატებითი რაოდენობით გადაცემა შესაძლოა განიხილოს, თუ მოკავშირეებთან ერთად მათი ჩანაცვლების ვარიანტებს იპოვის.