“კოალიცია ცვლილებისთვის” და პარტია „დროას“ ერთ-ერთი ლიდერის, გიგა ლემონჯავას განცხადებით, პირველი, რომელსაც კოალიციური ხელისუფლება გააკეთებს, ეს „უცხოური გავლენის გამჭვირვალობის შესახებ“ კანონის გაუქმება იქნება.

მისივე შეფასებით, საკონსტიტუციო სასამართლოს „ქართული ოცნების“ საპატიო თავმჯდომარე, ბიძინა ივანიშვილი, როგორც უკანონო ძალაუფლების შენარჩუნების ბერკეტს ისე უყურებს.

“არავითარი პოზიტიური მოლოდინი საკონსტიტუციო სასამართლოში განხილვასთან დაკავშირებით არ მაქვს, იმიტომ, რომ სასამართლო ხელისუფლება მთლიანად და განსაკუთრებით საკონსტიტუციო სასამართლო, ივანიშვილს აქვს მიტაცებული.

საკონსტიტუციო სასამართლოს ივანიშვილი უყურებს როგორც საკუთარი არალეგიტიმური, უკანონო ძალაუფლების შენარჩუნების ბერკეტად, ჩვენ კარგად ვიცით, რა შემადგენლობაა საკონსტიტუციო სასამართლოს კოლეგია. კარგად ვიცნობთ იმ ადამიანებს, რომლებიც განიხილავენ ოპოზიციის, სამოქალაქო საზოგადოების და პრეზიდენტის სარჩელებს, “რუსული კანონის” შეჩერებასთან დაკავშირებით. ჩვენ კარგად ვიცნობთ ამ ადამიანების მოღვაწეობას საკონსტიტუციო სასამართლოში თუ მანამდე.

შესაბამისად, არავითარი პოზიტიური მოლოდინი განხილვასთან დაკავშირებით არ მაქვს, მაგრამ ზუსტად ვიცი, რომ 26 ოქტომბერს შეიცვლება ხელისუფლება საქართველოში და პირველი, რასაც ახალი ევროპული, დემოკრატიული და კოალიციური ხელისუფლება გააკეთებს, ეს “რუსული კანონის” გაუქმება იქნება და ევროკავშირისა და ნატოსკენ საქართველოს გზის გაგრძელება“, - განაცხადა ლემონჯავამ.