სახელმწიფო რელიგიის სტატუსი ეკლესიას გადააქცევს სახელმწიფოს დაქვემდებარებულ ინსტიტუციად, სადაც მთავრობას უფლება ექნება გააკონტროლოს ყველაფერი, საკადრო გადაწყვეტილებების ჩათვლით, - ამის შესახებ „ძლიერი საქართველოს“ წევრი, ფიქრია ჩიხრაძე სოციალურ ქსელში წერს.

მისი თქმით, იმედია, სასულიერო პირები და საპატრიარქო სრულად აცნობიერებენ შექმნილ ვითარებას და ხიფათს, რაც ამ შეთავაზების უკან იმალება.

„მართლმადიდებლობის სახელმწიფო რელიგიად გამოცხადების კამპანია გასული საუკუნის მიწურულსაც წამოიწყეს ცალკეულმა პოლიტიკურმა ჯგუფებმა. მაშინ ეკლესიისა და სახელმწიფოს თანამშრომლობით, საქართველოს კათოლიკოს-პატრიარქის აქტიური მონაწილეობით ჩამოყალიბდა პოზიცია, რაც მალევე სახელმწიფოსა და მართლმადიდებელ ეკლესიას შორის საკონსტიტუციო შეთანხმების სახით გაფორმდა.

საპარლამენტო კომისიაში, რომელიც ამ საკითხებზე მუშაობდა, მეც ვიყავი ჩართული. დიდი წვლილი აქვს საკითხის გადაწყვეტაში შეტანილი პარლამენტის თავმჯდომარეს ზურაბ ჟვანიას, რომელიც პრაქტიკულად ჩართული იყო ყოველდღიურ საქმიანობაში. სასულიერო პირების მონაწილეობით ხანგრძლივი და ფუნდამენტური სამუშაო ჩატარდა და შევთანხმდით მოდელზე, რომელიც ქმნიდა სახელმწიფოსა და ეკლესიას შორის თანამშრომლობის ფართო შესაძლებლობას, ამავდროულად, ინსტიტუციურად სრულად მიჯნავდა მათ ერთმანეთისგან და უზრუნველყოფდა ეკლესიის საქმიანობაში ჩაურევლობას.

კონსტიტუციური შეთანხმება არის კანონთა იერარქიაში უმაღლეს საფეხურზე მდგომი შიდასახელმწიფოებრივი ნორმატიული აქტი, რაც საქართველოს სამოციქულო ავტოკეფალიურ მართლმადიდებელ ეკლესიას ანიჭებს განსაკუთრებულ სტატუსს, უზრუნველყოფს მის დამოუკიდებლობას და დაცვას პოლიტიკური ჩარევისაგან. ამავდროულად, ეს შეთანხმება სრულ თანხვედრაშია რწმენისა და აღმსარებლობის თავისუფლებასთან.

სახელმწიფო რელიგიის სტატუსი ეკლესიას გადააქცევს სახელმწიფოს დაქვემდებარებულ ინსტიტუციად, სადაც მთავრობას უფლება ექნება გააკონტროლოს ყველაფერი, საკადრო გადაწყვეტილებების ჩათვლით.

რას ემსახურება მართლმადიდებლობის სახელმწიფო რელიგიად გამოცხადების ახლანდელი კამპანია?

1.წინასაარჩევნოდ ხელისუფლების ეკლესიაზე მზრუნველის მანტიის მორგებას;

2.ხალხის მოტყუებას რომ რწმენის განმტკიცებას უწყობენ ხელს და დღეს არსებულზე უკეთეს სტატუსს სთავაზობენ ეკლესიას;

3. ჩემი ღრმა რწმენით, ზრუნვის საფარქვეშ ეკლესიის სრულად დამორჩილების განზრახვას.

გაუთვითცნობიერებელი ადამიანი შეიძლება ამ პოპულიზმით მარტივად მოტყუვდეს, მაგრამ, იმედია, სასულიერო პირები და საპატრიარქო სრულად აცნობიერებენ შექმნილ ვითარებას და ხიფათს, რაც ამ შეთავაზების უკან იმალება. სრული დარწმუნებით შემიძლია ვამტკიცო, რომ საქართველოს პატრიარქისთვის უმნიშვნელოვანესი დატვირთვა აქვს საკონსტიტუციო შეთანხმების არსებობას და ეს შეთავაზება კი არის მიუღებელი, ხელოვნური და სახიფათო“, -აცხადებს ფიქრია ჩიხრაძე.